ԱՄՆ-ն և Ուկրաինան պայմանավորվել են, որ հաջորդ շաբաթ պատվիրակությունները կհանդիպեն Սաուդյան Արաբիայում: Այդ մասին Sky News-ին ասել է Մերձավոր Արևելքի հարցերով Միացյալ Նահանգների նախագահի հատուկ ներկայացուցիչ Սթիվ Վիտկոֆը: Նրա խոսքերով՝ բանակցությունները կանցկացվեն Էր Ռիյադում կամ, գուցե, Ջիդայում: «Քաղաքը կարող է փոխվել, բայց բանակցությունները տեղի կունենան Սաուդյան Արաբիայում»,- մանրամասնել է Վիտկոֆը:
Ըստ նրա՝ ներկայումս համաձայնեցվում է բանակցող թիմի կազմը, Վաշինգտոնը կապի մեջ է Կիևի հետ, տեղյակ են պահել նաև Մոսկվային: Վիտկոֆն ասել է, որ Սպիտակ տունը նամակ է ստացել Ուկրաինայի նախագահ Զելենսկուց, որտեղ նա ԱՄՆ-ին երախտագիտություն է հայտնել: Վաշինգտոնում, ըստ այդմ, տպավորություն ունեն, որ Ուկրաինայի նախագահը բանակցություններին վերադառնալու պատրաստակամություն ունի, ինչը թույլ է տալիս հուսալ, որ Սաուդյան Արաբիայում հանդիպումն արդյունավետ կլինի:
Ամերիկյան բարձրաստիճան պաշտոնյայի դիտարկումներից պարզ է դառնում, որ Վաշինգտոնը Կիևի հետ կքննարկի վեցամսյա հրադադար հաստատելու առաջարկությունը: Լրագրողի հարցին, թե արդյոք Սպիտակ տունը պատրա՞ստ է կրկին ընդունել Զելենսկուն և վերականգնել Ուկրաինային աջակցությունը, Վիտկոֆը պատասխանել է․ «Նախագահ Թրամփն ասել է, որ հետդարձի ճանապարհ կա, և նախագահ Զելենսկին ցույց է տվել, որ մտադիր է այդ ճանապարհն անցել: Հույս կա, որ մի փուլում համագործակցությունը կվերսկսվի, և ամեն ինչ կվերականգնվի»:
Լավատեսության ի՞նչ հիմքեր ունի Մերձավոր Արևելքի հարցերով ԱՄՆ նախագահի հատուկ ներկայացուցիչը, կարելի է ամերիկյան դիվանագիտության «նոու-հաու» համարել, որովհետև Մոսկվայից ամենաբարձր մակարդակով հնչել է տրամագծորեն հակառակ տեսակետ: ՏԱՍՍ-ը փոխանցում է նախագահ Վլադիմիր Պուտինի մոտեցումը, որ ուկրաինական կարգավորման համար անհրաժեշտ է ոչ թե ուժերի վերադասավորում իրականացնելու համար կարճաժամկետ հրադադար, այլ կայուն խաղաղություն հաստատել:
Ավելի վաղ Ուկրաինայի նախագահ Զելենսկին եվրոպացի գործընկերների հետ քննարկումներում առաջարկել է հրադադար հաստատել օդում և ծովում: Նա մասնավորապես այն հեռանկարն է պատկերել, երբ կողմերը ձեռնպահ կմնան ԱԹՍ-ների և հրթիռների կիրառումից, չեն թիրախավորի կրիտիկական նշանակության ենթակառուցվածքները: Ռուսաստանի նախագահը «կարճաժամկետ հրադադարի» գաղափարը մերժել է:
Ավելին, ըստ Պուտինի, կրակի դադարեցման ռուսաստանյան նախապայմանները մնում են ուժի մեջ: Այն է՝ ուկրաինական զորքերը պետք է թողնեն Դոնեցկի, Լուգանսկի, Խարկովի և Զապորոծիեի մարզերի տարածքները, Ուկրաինան՝ հրաժարվի ՆԱՏՕ-ին անդամակցելուց: Այս կետն ավելի հանգամանալի մեկնաբանել է արտաքին գործերի նախարար Լավրովը. Ռուսաստանն ուկրաինական տարածքում եվրոպական երկրների զորքերի տեղաբաշխումը կհամարի պատերազմին ՆԱՏՕ-ի անմիջական ներգրավվածություն:
Մի իրավիճակում, երբ պատերազմ սանձազերծած կողմը պահանջում է իր պայմաններով «կայուն խաղաղություն» և հետկոնֆլիկտային այնպիսի ստատուս-քվո, որ երբեք Ռուսաստանի համար սպառնալիք չպետք է ներկայացնի, Սաուդյան Արաբիայում ԱՄՆ-ի և Ուկրաինայի պատվիրակությունների միջև ձեռք բերված ցանկացած համաձայնություն գործնական ի՞նչ արժեք կարող է ունենալ:
Ավելի ճիշտ՝ ի՞նչ երաշխիք ունի ԱՄՆ նախագահը, երբ իր հատուկ ներկայացուցչին և ազգային անվտանգության հարցերով գլխավոր խորհրդական Ուոլտցին հանձնարարել է ձևավորել Ուկրաինայի հետ բանակցող թիմ: Մամուլում տեղեկություն է հայտնվել, որ Էր-Ռիյադում Լավրով-Ռուբիո բանակցություններից հետո Շվեյցարիայում ԱՄՆ-ի և Ռուսաստանի միջև փորձագիտական մակարդակի գաղտնի բանակցություններ են ընթացել: Կարելի՞ է ենթադրել, որ «սատանան մանրուքների մեջ է» դժվարությունը հաղթահարելու համար Մոսկվան և Վաշինգտոնը ներգրավել են «տեխնիկական մասնագետների»: Այլապես կամ ամերիկա-ուկրաինական բանակցություններ չպետք է սկսվեն, կամ Վաշինգտոնը նախապես հաշտված է Պուտինի կողմից մերժում ստանալու անխուսափելիության հետ և ունի «պլան Բ»: Երրորդ տարբերակը պարզապես անհնար է անգամ դիտարկել, քանի որ Պուտինի կողմից «վեցամսյա հրադադարի» առաջարկության չոր մերժումը կնշանակի, որ նա Դոնալդ Թրամփին պարզապես ծաղրում է:
