Քարահունջը և Stonehenge-ը կառուցողները նույն քաղաքակրթության կրողներն են եղել: Այսօր «Մենք» հայագիտական սեմինարների առաջին հանդիպման բանախոս, Հայ-ռուսական համալսարանի դասախոս, կենսաբանական գիտությունների թեկնածու, մաթեմատիկոս Վաչագան Վահրադյանը այս եզրահանգումը ներկայացրեց «Հնագույն մեգալիթյան կառույցները Հայաստանում. Քարահունջ» թեմայի շրջանակում: Տեղեկացնենք, որ Քարահունջն ուսումնասիրել է ակադեմիկոս Պարիս Հերունին և պարզել, որ այն ունի 7500 տարվա պատմություն: Սակայն այսօր սեմինարի ընթացքում Վ. Վահրադյանն ասաց, որ այն ունի շուրջ 14000 տարվա պատմություն: Հնագիտական պեղումների ընթացքում Քարահունջում հայտնաբերվել են մ.թ.ա. 3-րդ-ից 1-ին հազարամյակների դամբարաններ: Հնավայրը նման է անգլիական Սթոունհենջին:
«Օրինակ մեզ հաջողվեց գտնել անգլոսաքսոնական քրոնիկոնը, որի հենց առաջին պարբերության մեջ գրված է հետևյալ միտքը, որ բրիտները Բրիտանիայի առաջին բնակիչներն են եղել, ովքեր եկել են Հայաստանից»,- մեկնաբանեց մաթեմատիկոսը: Այս արտահայտությունը նրան ստիպել է ուսումնասիրություններ կատարել: Նա նաև պարզել է, որ Բրիտանիայի Stonehenge-ը կառուցել են բրիտները, և եթե նրանք կառուցել են Stonehenge-ը, ապա հիմք ունենք ենթադրելու, որ նրանք հետք են թողել Հայաստանում, որն էլ Քարահունջն է: Նրա խոսքով`մեր հուշարձանի ուսումնասիրությունը ապացուցում է , որ Հայաստանը եղել է համամարդկային քաղաքակրթության օրրան: Վաչագան Վահրադյանը ներկայացրեց մի պրեզենտացիա, որում լեզվաբանորեն և աստղագիտորեն բացատրվում էր երկու հուշարձանների նմանության փաստը: Նշվում էր, որ Քարահունջ և Սթոունհենջ հուշարձանների այս անվանումները, կառուցվածքները նույնպես նմանություններ ունեն: Այս ամենը մաթեմատիկոսին հիմք է տվել ենթադրելու, որ երկու հուշարձանների հեղինակները հայեր են եղել:
