«Հանուն Հանրապետության» կուսակցության նախագահ Արման Բաբաջանյանը «Ֆեյսբուք»-ի իր էջում անդրադարձել է իր վերաբերյալ ՀՖՖ նախկին նախագահ Ռուբեն Հայրապետյանի վերջին հայտարարություններից մեկին, որում նշվել էր, թե Բաբաջանյանը պետք է պատասխան տա՝ ինչպես է Շուշիում ուղղություն տվել,որ «խփեն կոնկրետ տեղերի»:
Բաբաջանյանը գրել է.
«Ազգությամբ «նեմեց», որը, զարմանալիորեն, փախավ ոչ թե Գերմանիա, այլ բոլոր փախածների «հայրենիք» Ռուսաստան, հարկ է համարել անդրադառնալ Շուշիում գտնվելու օրերին՝ 44-օրյա պատերազմի ընթացքում իմ գործունեությանը։
Եթե ինչ-որ մեկին հետաքրքրում է, թե Շուշիում ինչով եմ առհասարակ զբաղված եղել, քանի տասնյակ ծանր վիրավոր ոստիկանի եմ տեղավորել Շուշիի նկուղներում՝ բառացիորեն նրանց կյանքը փրկելով, թող դիմեն իրավապահներին, թող քննեն, իմանան՝ ինչով եմ զբաղվել Շուշիում՝ փոխոստիկանապետ Արամ Հովհաննիսյանի, ինչպես նաև այլ՝ արցախցի և ՀՀ ոստիկանական համակարգի բարձրաստիճան պաշտոնյաների հետ։
Դանիել Իոանիսյանն էլ լիքը պատմելու բան կունենա:
Երբ մարդու լեզուն գլխից առաջ է վազում, միշտ անհարմար բաներ են ստացվում։ Ի դեպ, Շուշիում իմ այդ «թշնամական» գործունեության պատճառով Շուշիից Հայաստան վերադառնալիս ՀՀ պաշտպանության նախարարի խորհրդականը տեղեկացրեց, որ Ադրբեջանը իմ նկատմամբ միջազգային հետախուզում է հայտարարել։
Եվ ես մենակ չէի այդ ցուցակում՝ նախագահ Արայիկ Հարությունյանը, ՊԲ հրամանատար Ջալալ Հարությունյանը, Դավիթ Բաբայանը և Սեյրան Օհանյանը ևս այդ խմբում էին: Խելք չունեք՝ գոնե ամոթ ունեցե՛ք»:
