Վաշինգտոն կատարած այցի ավարտին Նիկոլ Փաշինյանը հանդիպել է ԱՄՆ փոխնախագահ Ջեյմս Վենսի հետ: Հայաստանի կառավարության տարածած հաղորդագրությունը շատ կարճ է՝ քննարկել են հայ-ամերիկյան օրակարգին վերաբերող, և ռեգիոնալ նշանակության հարցեր: Հանդիպումը տեղեկատվական առումով բավականին անշուք է, հատկապես այն շուքի ֆոնին, որ հունվարի-ին հաղորդվել էր Հայաստանի և ԱՄՆ միջև ռազմավարական գործընկերության հանձնաժողովների կանոնադրության ստորագրման արարողությանը:
Հիշեցնեմ, որ այն ստորագրեցին Հայաստանի ԱԳ նախարար Միրզոյանն ու ԱՄՆ պետքարտուղար Բլինքենը: Հինգ օր անց Բլինքենը թողեց պաշտոնը, քանի որ ԱՄՆ կառավարումը ստանձնեց Դոնալդ Թրամփի հանրապետական վարչակազմը: Վաշինգտոն Նիկոլ Փաշինյանի այցը այդ վարչակազմի հետ փաստորեն առաջին հրապարակային շփման առիթն ու հնարավորությունն էր: Հարկ է նկատել, որ այդ հնարավորությունը օգտագործվել է խիստ ցածր ներկայացուցչականությամբ:
Նիկոլ Փաշինյանի վաշինգտոնյան քառօրյա այցի ընթացքում նա փաստացի հանդիպել է ԱՄՆ գործադիր իշխանության մեկ ներկայացուցչի՝ փոխնախագահ Վենսի հետ, այն էլ իր այցի վերջին օրը, և որի տեղեկատվական մատուցման ձևն ու բովանդակությունը թողնում է տպավորություն, որ հանդիպը ինքնին հաջողվել է միայն վերջին պահին: Համենայն դեպս, շատ խոսուն է այն, որ հանդիպման առնչությամբ կա ուղեկցող բավականին թափթփված լուսանկար, որը բացարձակապես չի կարող բնորոշ լինել միջպետական հարաբերության, առավել ևս՝ ռազմավարական գործընկերության մակարդակ ամրագրելու աշխատանքային մտադրություն արտահայտած և «փաստաթղթավորած» երկրների միջև հարաբերության:
Ընդ որում, սա ցուցիչ է նաև, թե այդ փաստաթղթի հանդեպ ինչպիսի վերաբերմունք կարող է ունենալ նոր վարչակազմը, և հետևաբար ազդանշան, թե ինչպիսի ահռելի աշխատանք ու ջանք ունի գործադրելու Երևանը՝ ամրագրված փաստաթուղթը իրապես միջպետական բովանդակության վերածելու համար, որպեսզի այն չմնա պարզապես նախորդ վարչակազմի քաղաքականության արտացոլում: Նիկոլ Փաշինյանը Վաշինգտոն այցի ընթացքում ունեցե՞լ է փակ հանդիպումներ: Գուցե, որոնք չեն հանրայնացվել:
Սակայն, միջպետական հարաբերություններում հրապարակային շփումների հանգամանքը ինքնին այդ հարաբերությունների բովանդակություն արտացոլող կարևոր ցուցիչ է: Միով բանիվ, Փաշինյանի Վաշինգտոն այցը վկայեց, որ ԱՄՆ նոր վարչակազմի հետ հարաբերությունը կառուցելու համար Երևանը թերևս պետք է կատարի շատ մեծ ծավալի՝ նախ տնային աշխատանք: Միևնույն ժամանակ, թերևս որակապես այլ աշխատանք պետք է կատարվի հենց Միացյալ Նահանգներում թե՛ Հայաստանի դիվանագիտական առաքելության, թե՛ նաև հայկական տարբեր կառույցների միջոցով, օգտագործելով այդ ռեսուրսը ԱՄՆ նոր իրավիճակին համարժեք գործողությունների պլան կազմելու և դրա իրագործման գործընկերային միջավայրը հագեցնելու համար:
Թերևս այդ նկատառումով էր առաջնորդվում Փաշինյանը այսպես ասած ոչ կառավարական, «ուղեղային սեկտորի» հետ շփումներում, որոնք կարծես թե համեմատաբար «առատ» էին Վաշինգտոն այցի ընթացքում: Իհարկե, այդ շփումների արդյունքը պետք է չափվի «գետնի վրա» պատկերի փոփոխությամբ:
