ՀՀ պաշտպանության նախարարության մամուլի քարտուղար Դավիթ Կարապետյանը, մեզ հետ զրույցում արձագանքելով Բաքվում Մոլդովայի դեսպան Իգոր Բոդյունի այն հայտարարությանը, թե Մոլդովան ափսոսանք է հայտնում Հայաստանին զենք վաճառելու կապակցությամբ և դա «ցավալի սխալ է համարում», հերթական անգամ արձագանքեց. «Հայաստանի Հանրապետության զինված ուժերի կարիքների համար սպառազինության և ռազմական տեխնիկայի ձեռքբերումները և գնումները իրականացվում են Հայաստանի Հանրապետության օրենսդրության և Միջազգային նորմերի ու պարտավորությունների շրջանակներում:
Ելնելով Ազգային անվտանգության շահերից՝ սպառազինության գնումների քանակի, տեսականու և վաճառող կողմի վերաբերյալ մանրամասները հրապարկման ենթակա չեն: Կարող եմ միայն նշել, որ Հայաստանի Հանրապետությունը անկախությունից ի վեր ոչ պիտանի սպառազինություն երբեք չի գնել: Իրենք նշում են, թե ոչ պիտանի զենք են վաճառել, ոչ պիտանի զենք մենք չենք գնել, իսկ թե որ երկրներից ենք գնում՝ դա մանրամասնելու կարիք չկա՝ ելնելով Ազգային անվտանգության շահերից»:
Հիշեցնենք, որ անցած շաբաթ խորհրդարանական լսումների ժամանակ Մոլդովայի պաշտպանության նախարարը խոստովանել էր, թե Հայաստանին է վաճառվել զենք և զինտեխնիկա, որը եղել է ժամկետանց և վաճառքի ենթակա: Իսկ Բաքվում Մոլդովայի դեսպան Բոդյուն ադրբեջանկան լրատվամիջոցներին ասել էր, որ պաշտոնական Քիշնևը նախաձեռնել է Հայաստանին գաղտնի զենք վաճառելու գործով քննություն, որը վնաս է հասցրել իրենց երկկողմ հարաբերություններին:
