Սաուդյան Արաբիայի արքայազն Բեն Սալմանը եղել է առաջին առաջնորդը, որի հետ հեռախոսազրույց է ունեցել Դոնալդ Թրամփը պաշտոնամուտից հետո: Ըստ հաղորդագրության՝ արքայազնը հայտնել է, որ Էր Ռիյադը պատրաստ է խորացնել գործակցությունն ԱՄՆ հետ և առաջիկա չորս տարիներին Նահանգներում կատարել ավելի քան 600 միլիարդ դոլարի ներդրում: Հնարավոր է նաև, որ Սաուդյան Արաբիան լինի Դոնալդ Թրամփի առաջին արտերկրյա այցելության վայրը Սպիտակ տուն վերադարձից հետո: Թրամփի առաջին նախագահության շրջանում Վաշինգտոնի և Էր Ռիյադի հարաբերությունը շատ սերտ ու ջերմ էր: Բայդենի վարչակազմի ժամանակաշրջանում նկատելի էր լարվածությունը:
Հայտնի է անգամ, որ արքայազնը չէր պատասխանել Բայդենի հեռախոսազանգին: Վաշինգտոն-Ռիյադ հարաբերությունը կարծես թե վերադառնում է ջերմացման շրջան, համենայն դեպս դատելով Թրամփի և Բեն Սալմանի հեռախոսազրույցի մասին հաղորդագրությունից: Հետաքրքիր է՝ դա ինչպե՞ս կանդրադառնա Սաուդյան Արաբիայի և Իրանի հարաբերության վրա՝ հաշվի առնելով, որ երեք տարի առաջ տեղի ունեցավ այդ հարաբերության կարգավորում՝ Չինաստանի միջնորդությամբ:
ԱՄՆ հետ հարաբերության ջերմացումը, անկասկած, ավելի կբարձրացնի Սաուդյան Արաբիայի ռեգիոնալ դերը, նաև միջազգային նշանակությունը: Այդ առչությամբ՝ վերստին ուշադրության է արժանի հարցը, թե ինչո՞ւ առ այսօր շարժ չկա հայ-սաուդական միջպետական հարաբերության գործընթացում: 2023 թվականի ավարտին Արաբական Միացյալ Էմիրություններում Հայաստանի և Սաուդյան Արաբիայի դեսպանները ստորագրեցին դիվանագիտական հարաբերություններ հաստատելու մասին համաձայնագիր, սակայն հետագա ավելի քան մեկ տարվա ընթացքում իրավիճակն այդ կետից առաջ կարծես թե չի շարժվել:
Մինչդեռ, Սաուդյան Արաբիայի հետ հարաբերության առաջընթացը կարևոր է թերևս ոչ միայն այդ երկրի ռեգիոնալ և միջազգային քաղաքական կշռի աճի, այլ նաև տնտեսական հնարավորությունների տեսանկյունից: Սաուդյան Արաբիայի և Արաբական Էմիրությունների պետական ներդրումային հիմնադրամներն այսօր ամենապահանջվածներից են աշխարհում, խոշոր ներդրումներ են իրականացնում տարբեր երկրներում: Ավելորդ է թերևս խոսել այն մասին, թե որքան մեծ է Հայաստանում օտարերկրյա ներդրումների աճի անհրաժեշտությունը:
