Երևանի Մետրոպոլիտենի գլխավոր տնօրենի ժ/պ Բաբկեն Սեդրակյանը հանդես է եկել ուղերձով․
«Ամանորն առանձնահատուկ խորհուրդ ունի մեր կյանքում. նոր հույսերի, արարումների և նպատակների ժամանակն է։ Տարեվերջին մենք արժևորում ենք անցած ճանապարհը՝ մեր ձեռքբերումները, փորձառությունները և հաղթահարած դժվարությունները, իսկ Նոր տարին դիմավորում ենք նոր երազանքներով ու ծրագրերով։
2024 թվականն արդեն ներդրեց իր անչափ կարևոր էջը Երևանի մետրոպոլիտենի պատմության մեջ՝ լի ձեռքբերումներով ու անհերքելի հաջողություններով։ Եվ մենք նոր պատմություն ենք սկսում՝ նոր վճռականությամբ ու նորանոր նպատակների իրականացման համոզմունքով՝ վստահ, որ հաջորդ տարին կլինի ավելի հաջողված, նորարար և առաջընթացիկ։
Հուսով ենք, որ 2024 թվականը հպարտանալու, գեղեցիկ հիշողության ու հիմնավոր վստահության լիցքեր է տվել բոլորիս՝ արագ, անվտանգ և անխափան ծառայություններով, որոնք հարմարավետ են դարձրել մեր կյանքն ու կեցությունը: Մաղթում ենք, որ նոր տարին նախորդից փոխառնի լավագույնն ու կատարելագործի արդեն իսկ ունեցածը, իսկ մենք ամեն ինչ կանենք այդ հենքի վրա արդեն նորագույնը կյանքի կոչելու համար:
Ամանորի առիթով ցանկանում եմ շնորհավորել ու շնորհակալություն հայտնել և՛ մեր անձնակազմին, և՛ ուղևորներին: Մենք միասին ենք կերտում Երևանի մետրոպոլիտենի ապագան, և մեր ջանքերի շնորհիվ այն միշտ կլինի զարգացման ու կայունության խորհրդանիշ։
Թո՛ղ գալիք տարին լինի առողջության, բարեկեցության և ներդաշնակության տարի։ Թո՛ղ ձեր ընտանիքներում իշխեն սերն ու ջերմությունը, իսկ ձեր նպատակները պսակվեն հաջողությամբ ու նվաճումներով։
Թո՛ղ բոլորիս տներն ու սրտերը լցվեն խաղաղությամբ, ուրախությամբ և երջանկությամբ։ Շնորհավոր Նոր տարի և Սուրբ Ծնունդ»։
