Նոյեմբերի 3-ին Ադրբեջանի ներքին գործերի նախարարությունը հաղորդագրություն է տարածել, որ Լերիկ քաղաքում ոստիկանության աշխատակիցներին զինված դիմադրություն ցույց տալու ընթացքում սպանվել է 1971թ. ծնված Շաիգ Աղաևը: Ըստ պաշտոնական վարկածի՝ միջադեպը տեղի է ունեցել հանդիսությունների տանը, Աղաևը չի ենթարկվել զենքը հանձնելու պահանջին, ոստիկանների ուղղությամբ կրակ է բացել և պատասխան կրակով սպանվել:
MeydanTV-ի տեղի աղբյուրները, սակայն, հայտնել են, որ Աղաևը բանտից վերջերս էր ազատվել, այդ օրը գտնվել է եղբոր տանը: Ոստիկանության աշխատակիցները ներկայացել են և պահանջել, որ նա հանձնի իր մոտ գտնվող զենքը, վեճ է ծագել, որի ժամանակ ոստիկաններից մեկը կրակել և սպանել նրան:
Բաքվի մերձիշխանական մամուլն այդ սպանդի մասին ոչինչ չի հայտնում: Լերիկի շրջանը սահմանակից է Իրանին, պատմական Թալիշտստանի մի մասն է կազմում, որտեղ 1939թ. մարդահամարի տվյալներով՝ էթնիկ թուրք-ադրբեջանցիները բնակչության ընդամենը 20 տոկոսն են կազմել: Խորհրդային հաջորդ մարդահամարով՝ թալիշներն արդեն որպես առանձին ազգություն չեն հաշվառվել:
Անկախ աղբյուրները նշում են, որ Լերիկի շրջանի բնակավայրերի ճնշող մեծամասնությունը թալիշաբնակ է, չնայած ճնշումներին, նրանք պահել են իրենց լեզուն, սովորույթները: Լերիկ քաղաքի բնակիչները MeydanTV-ին բողոքել են, որ շրջանի բոլոր թալիշաբնակ գյուղերում ոստիկանությունը հսկիչ անցակետեր է տեղադրել, ելումուտը խստիվ վերահսկվում է:
«Գյուղեր ունենք, որ միայն ձիասայլով ենք հասնում, իսկ ոստիկանները տուն վերանորոգելու համար գնած շինանյութը բռնագրավում են»,- պատմել է Լերիկի բնակիչներից մեկը: Հուլիսի 24-ին Բաքվի օդանավակայանում բերման է ենթարկվել Մինսկի համալսարանի ասպիրանտ, էթնիկ թալիշ Իգբալ Աբիլովը, ապա կալանավորվել:
Նա մեղադրվում է ազգամիջյան թշնամանք քարոզելու և Հայաստանի օգտին լրտեսության մեջ: Մեղադրանքի հիմքում Աբիլովի ազգագրական ուսումնասիրություններն են, որ նվիրված են թալիշների ծագմանը, լեզվին, ազգային սովորություններին: Աբիլովը հեռավար կապ է պահպանել Երևանի համալսարանի արևելագիտության ամբիոնի հետ: Այդ տեսագրություններն էլ համարվում են նրա լրտեսական գործունեության «իրեղեն ապացույցներ»:
Նախագահական արտահերթ ընտրություններին ընդառաջ Իլհամ Ալիևն այցելել է Լենքորան, որ թալիշաբնակ տեղաշրջանի կենտրոնն է և շահագործման հանձնել նորակառույց բանտը: Դա շատ խորհրդանշական էր: Բաքվի իշխանությունը հստակ ուղերձ է հղել, որ թալիշական ինքնության, ազգային լեզվով կրթության համար պայքարի ցանկացած փորձ բռնաճնշվելու է:
