Հայաստանի բուհերում սովորում է 3000 օտարերկրյա քաղաքացի: Այս մասին «Առաջին լրատվականին» տեղեկացրեց ԿԳՆ արտաքին կապերի և սփյուռքի վարչությունից Վահե Գրիգորյանը`ընդգծելով, որ վերջին տարիների ընթացքում այդ տվյալը պահպանվում է:
«Օտարերկրյա քաղաքացիների ընդունելությունը դեռ չի ավարտվել, մոտ երեք ամսվա տվյալներով՝ 3000 ուսանող կա»,- ասաց Վ. Գրիգորյանը: «Առաջին լրատվականի» այն հարցին, թե որ երկրների քաղաքացիներն են նախընտրում ուսում ստանալ Հայաստանում՝ պատասխանեց, որ հիմնականում Իրանից, Հնդկաստանից, Սիրիայից, Չինաստանից, Իսրայելից: ԿԳՆ տվյալներով` օտարերկրյա ուսանողները հիմնականում ուսում են ստանում Բժշկական համալսարանում, Կոմիտասի անվան պետական կոնսերվատորիայում:
Հայաստանում ուսում ստանալու ցանկության պատճառները փորձեցինք պարզել Բժշկական համալսարանի երկրորդ կուրսի հնդիկ ուսանող Ակաշ Հեմանից, ով արդեն մեկուկես տարի է ապրում է Հայաստանում, ունի բազմաթիվ հայ ընկերներ և քիչ թե շատ տիրապետում է հայերենին: «Ես սովորելու եկա Հայաստան, քանի որ այստեղ ուսումն ավելի մատչելի է: Իմ ընտանիքը հնարավորություն չունի ապահովել ինձ ուսմամբ Հնդկաստանում, որովհետև այնտեղ ավելի թանկ է»,- ասաց Ակաշը:
Անդրադառնալով ուսման որակին` օտարերկրյա ուսանողը նշեց, որ առայժմ բավարարում է: «Ես գոհ եմ այս ուսումից, բայց մտադիր եմ խորացնել գիտելիքներս բժշկության բնագավառում ավելի և ավելի, բայց հաստատ դեռ չեմ որոշել ինչպես և որտեղ»,- մեկնաբանեց հնդիկ ուսանողն`ընդգծելով, որ կցանկանար Հայաստանում աշխատել և ընտանիք կազմել:
