Ռուսական Regnum լրատվական գործակալության փոխանցմամբ՝ այս տարվա առաջին 8 ամիսներին Վրաստանի խոշորագույն առևտրային գործընկերների եռյակը մնացել է անփոփոխ։ Առաջին տեղը կայուն ձևով, վերջին տարիների նման, շարունակում է պահպանել Թուրքիան, որի հետ արտաքին առևտրի ծավալը հասել է 946 միլիոն դոլարի։
Ընդ որում՝ Թուրքիան համարվում է Վրաստանի ներկրման ոլորտի առաջատարը։ Այս տարի Թուրքիայից Վրաստան է ներկրվել 800 միլիոն դոլարի արտադրանք։ Միևնույն ժամանակ, այս տարվա 8 ամիսներին Վրաստանի արտահանումը դեպի Թուրքիա կազմել է 146 միլիոն դոլար, ինչը 4 միլիոն դոլարով ավելի պակաս է՝ նախորդ տարվա նույն ժամանակահատվածի համեմատությամբ։
Վրաստանից արտահանման ցուցանիշով առաջատարը Ադրբեջանն է՝ 234 միլիոն դոլար: Ընդհանուր առմամբ, արտաքին առևտրի ծավալով Ադրբեջանը զբաղեցրել է 2-րդ տեղը (622 միլիոն դոլար), իսկ Ուկրաինան՝ 3-րդ տեղը՝ 546 միլիոն դոլար։
Այս տարվա առաջին 8 ամիսներին Վրաստանի արտաքին առևտրի ծավալը, նախորդ տարվա միևնույն ժամանակահատվածի համեմատ, աճել է 39 տոկոսով և հասել 5.7 միլիարդ դոլարի։ Արտահանումն աճել է 41 տոկոսով (1.4 միլիարդ դոլար), իսկ ներկրումը՝ 38 տոկոսով (4.3 միլիարդ դոլար)։ Բացասական առևտրային հաշվեկշիռը գերազանցել է 2.9 միլիարդ դոլարը։
