Սպիտակ տունը հայտարարել է, որ Իսրայելը հավանություն է տվել Գազայի հատվածում հրադադարի և պատանդների ազատ արձակման համաձայնագրի պայմաններին, որոնք ներառում են Իսրայելի պաշտպանության բանակի (ԻՊԲ) մասնակի դուրսբերում Ֆիլադելֆիայի միջանցքի երկայնքով ընկած շրջաններից:
Այս մասին ճեպազրույցի ժամանակ հայտնել է Սպիտակ տան Ազգային անվտանգության հարցերով խորհրդական Ջոն Քիրբին։
«Գործարքն ինքնին, ներառյալ միջանկյալ առաջարկը, որի վրա սկսել ենք աշխատել…., նախատեսում է իսրայելական պաշտպանական ուժերի դուրսբերում բոլոր խիտ բնակեցված տարածքներից, և սա ներառում է այդ միջանցքի երկայնքով ընկած շրջանները», – ասել է Քիրբին՝ ընդգծելով, որ «սա այն առաջարկն է, որին Իսրայելը համաձայնել է»։
Նա հավելել է՝ «ակնհայտ է, որ այն, ինչ տեղի է ունեցել անցած հանգստյան օրերին (խմբ.՝ Գազայի հատվածում վեց պատանդների մարմինների հայտնաբերումը), ընդգծում է, թե որքան կարևոր է դա անել հնարավորինս արագ»։
Այնուամենայնիվ, Քիրբին հրաժարվել է պարզաբանել՝ արդյոք դա նշանակում է, որ ԱՄՆ-ն համաձայն է, որ ԻՊԲ-ն մնա Ֆիլադելֆիայի միջանցքի երկայնքով ընկած ավելի քիչ բնակեցված տարածքներում:
Իսրայելի վարչապետ Բենիամին Նեթանյահուն սեպտեմբերի 2-ին Երուսաղեմում կայացած մամուլի ասուլիսում հայտարարել էր, որ եթե ԻՊԲ-ն միջանցքը լքի նույնիսկ համաձայնագրի առաջին՝ 42-օրյա փուլում, ապա ՀԱՄԱՍ-ը կկարողանա վերազինվել, վերակազմավորվել և էլ ավելի շատ զանգվածային սպանություններ իրականացնել։
Եգիպտոսը նույնպես պահանջում է, որ Իսրայելը դուրս բերի զորքերը Ֆիլադելֆիայի միջանցքի երկայնքով ընկած շրջաններից։ Եգիպտոսի պահանջը պաշտպանել են Կատարն ու Սաուդյան Արաբիան։
