Վլադիմիր Պուտինի Բաքու այցի նախօրեին ռուսաստանյան որոշ թելեգրամ-ալիքներ՝ հղելով «թուրքական լրատվամիջոցներին» գրեցին, որ Կուրսկի մարզում Ուկրաինան «կիրառում է խորհրդային Տոչկա ՈՒ հրթիռներ», «Ադրբեջանական մամուլն ավելի հեռու գնաց եւ ենթադրեց, որ «այդ, ինչպես նաեւ խորհրդային արտադրության որոշ ՀՕՊ միջոցներ, հնարավոր է, Ուկրաինային Հայաստանն է մատակարարել»:
Թե ՆԱՏՕ-ի երկրներից արդիական ՀՕՊ համակարգեր եւ գերճշգրիտ հրթիռներ ստացող Ուկրաինայի ինչի՞ն են պետք «Տոչկա ՈՒ»-ն եւ «Բուկ»-ը՝ ռուս-ադրբեջանական քաղտեխնոլոգներին չի հուզել: Կարեւոր է ռուսաստանցիներին ներշնչել, որ Հայաստանը «կռվում է Ռուսաստանի դեմ»:
Այս հնարքի «գլխին սառը ջուր լցրել» Ուկրաինայի Ռազմա-ծովային ուժերի խոսնակ Դմիտրի Պլետենչուկը: Պուտին-Ալիեւ բանակցություններից հետո նա բացահայտել է, որ Ռուսաստանը Սեւ ծովից Կասպից ծով է տեղափոխել երկու «Կարակուրտ» նախագծի ռազմանավ, որոնք ընդունակ են կրել եւ արձակել «Կալիբր» տեսակի բալիստիկ հրթիռներ: Պլետենչուկի գնահատմամբ՝ դա Ուկրաինայի համար սպառնալիք է:
Կասպից ավազանից «Կալիբր» բալիստիկ հրթիռներ Ռուսաստանը կիրառել է Սիրիայում ԻԼԻՊ-ի հենակետերը խոցելու նպատակով: Ադրբեջանական կողմն այդ ժամանակ չէր թաքցրել, որ իր օդային տարածքն այդ նպատակով օգտագործելու համաձայնություն տվել է: Պուտին-Ալիեւ համատեղ հայտարարության մի դրույթը վերաբերում է «նավաշինական համատեղ ծրագրին»: Ֆորմալ ձեւակերպմամբ խոսքը «լցանավերի» մասին է:
Բայց, դատելով Ուկրաինայի ՌԾՈՒ խոսնակի բացահայտման ժամանակագրությունից, Կիեւում անհավանական չեն համարում, որ Կասպից ծովից «Կալիբր» հրթիռներով հարձակման ենթարկվելու ծրագիրը Պուտին-Ալիեւ բանակցություններում քննարկվել է, եւ «դա սպառնալիք է»: Սեւ ծովում Ռուսաստանի ռազմանավերը մշտապես ենթարկվում են ուկրաինական ԱԹՍ-երի եւ ռոբոտ-մարտանավակների հարձակումներին:
Որոշ տեղեկություններով՝ Սեւծովյան նավատորմի մի մասն Ռուսաստանը «վերաբազավորել է Աբխազիայում»: Այժմ հայտնի է դառնում, որ առնվազն երկու ռազմանավ էլ տեղափոխվել է Կասպից ծով: Պուտին-Ալիեւ հայտարարության տեքստում հղում կա Կասպից ծովի իրավական կարգավիճակի մասին պայմանագրին: Ոչ ոք վստահաբար չի կարող պնդել, որ այն գաղտնի հավելվածներ չունի:
Կամ ի՞նչ երաշխիք կա, որ այդ հնգակոզմ պայմանագրից զատ ռուս-ադրբեջանական «սեպարատ պայմանավորվածություններ» չկան: Այլապես Ուկրաինայի ՌԾՈՒ խոսնակ Պլետենչուկն ինչու՞ հենց ՌԴ նախագահի Բաքու այցից հետո է խոսում Կասպից ծովից ռազմական սպառնալիքի մասին:
Պուտին-Ալիեւ համատեղ հայտարարությունը քաղաքական առումով հակաուկրաինական է: Կասպից ծովում Ռուսաստանն, իհարկե, սեփական ջրային սահմաններ եւ նավատորմ ունի: Բայց երբ մի քանի տարի առաջ հենակայանը եւ հրամանատարական կետն ու ենթակառուցվածքներն Աստրախանից տեղափոխվեցին հարավ՝ Դաղստանի ափեր, ադրբեջանական փորձագետները տագնապ հնչեցրին, որ «Բաքվի ծովախորշը վերածվում է թիրախի»:
Քառասունչորսօրյա պատերազմից հետո Բաքվի ծովախորշում ռուսական ռազմանավերի մի քանի հանդիսավոր ընդունելություն է կազմակերպվել: Հարկ եղած դեպքում Ադրբեջանը կարող է նաեւ իր ջրային տարածքներում «հյուրընկալել» Ուկրաինայի դեմ «Կալիբր» հրթիռներ արձակող ռազմանավ: Դա, ինչ խոսք, ռիսկային կլինի, բայց ռուսներն ասում են չէ՞. «Պարտքը հատուցմամբ է գեղեցիկ»:
