Լիբիայի Ազգային անցումային խորհրդի ներկայացուցիչները հայտարարել են, որ նշանակալի հաջողություններ են ունեցել երկրի հարավում և գրավել են ռազմավարական կարևոր նշանակություն ունեցող մի քանի օբյեկտներ:
Ապստամբների ղեկավարությունը մասնավորապես նշել է, որ այժմ ավելի հեշտ կկարողանա տնօրինել Մուամար Քադաֆիին հավատարիմ մնացած ուժերի կողմից վերահսկվող Բանի Վալիդ և Սիրթ քաղաքներ մտնող ճանապարհները:
Ինչպես գրում է բրիտանական Financial Times-ը, ապստամբներին հաջողվել է ստանալ Մուամար Քադաֆիի բանկային հաշիվներից մեկից օգտվելու հնարավորություն. հաշվի վրա 23 միլիարդ դոլար է եղել:
Թունիսի լրատվամիջոցները հայտնում են, որ այդ երկրի անվտանգության ծառայությունները ձերբակալել են Մուամար Քադաֆիի կառավարության` Լիբիայի ժողովրդական կոմիտեի նախկին գլխավոր քարտուղար Բաղդադի Ալ-Մահմուդիին: Ձերբակալության համար հիմք է ծառայել այն փաստը, որ Մահմուդին, ով գտնվում էր Թունիսում, կեղծ փաստաթղթերով փորձել է հատել Ալժիրի հետ սահմանը:
Ինչպես նշում է BBC-ն, Ալ-Մահմուդին Թունիս էր հեռացել ապստամբների կողմից Տրիպոլին գրավելու օրերին:
