ԱՄՆ-ը հայտարարել է, որ կենտրոնացած են դիվանագիտական ջանքերի վրա՝ կապված Ադրբեջանի քաղաքացիական հասարակության ներկայացուցիչների և ընդդիմադիրների ձերբակալությունների հետ։ Այս մասին Պետքարտուղարության փոխխոսնակ Վեդանտ Պատելը հայտնել է ճեպազրույցի ժամանակ։
«Մենք շարունակելու ենք կենտրոնանալ դիվանագիտության վրա։ Այլ թարմացումներ, թե ինչ միջոցներ կարող է ԱՄՆ-ը դիտարկել այս դեպքում, չունեմ»,- նշել է Պատելը՝ մեկնաբանելով Ադրբեջանում քաղհասարակության ներկայացուցիչների վերջին ձերբակալությունները։ Նշենք, որ անցյալ շաբաթ Ադրբեջանում ձերբակալվել է իշխանությունների ևս մեկ քննադատ՝ նախկին դիվանագետ Էմին Իբրահիմովը։ Ձերբակալվել է նաև թալիշ հետազոտող Իքբալ Աբիլովը, որին մեղադրում են Հայաստանի հատուկ ծառայությունների հետ համագործակցելու մեջ։ Օրերս ԱՄՆ Պետքարտուղարությունը կոչ էր անում Ադրբեջանի իշխանություններին ազատ արձակել հայտնի տնտեսագետ և ընդդիմադիր գործիչ Գուբադ Իբադօղլուին։
«Ակտիվիստ և գիտնական Գուբադ Իբադօղլուն շարունակում է գտնվել տնային կալանքի տակ և չի կարողանում լքել Ադրբեջանը կամ լինել իր ընտանիքի հետ։ Նրա ձերբակալման մեկ տարին լրանալուց հետո մենք կրկին կոչ ենք անում Ադրբեջանի կառավարությանը՝ ազատ արձակել նրան և բոլոր մյուսներին, որոնք անարդարացիորեն ձերբակալված են»,- X-ում գրել էր Պետքարտուղարության խոսնակ Մեթյու Միլլերը
