Արժույթի միջազգային հիմնադրամը (ԱՄՀ) 2012 թ. համար աշխարհի շատ երկրներում կանխատեսում է տնտեսական աճի տեմպերի նվազում: ԱՄՀ վերլուծաբանները երեկ հրապարակված «Համաշխարհային տնտեսության հեռանկարներ» (World Economic Outlook) զեկույցում նշում են, որ հաջորդ տարի Հայաստանի տնտեսական աճը կկազմի 4.3% (այս տարվա համար կանխատեսումը 4.6% է)։
2012-ին Հայաստանում կանխատեսվում է գնաճի նվազում մինչև 3.3%՝ այս տարվա 8.8%-ի փոխարեն, կնվազի նաև արտաքին հաշվեկշռի բացասական մնացորդ/ՀՆԱ հարաբերակցությունը՝ 2012-ին կազմելով 10.7%՝ այս տարվա 11.7%-ի փոխարեն: ԱՄՀ կանախտեսումներում ՀՀ-ում անփոփոխ կմնա գործազրկության մակարդակը՝ 7.0%:
ԱՄՀ զեկույցի համաձայն՝ 2012-ին Հայաստանի համեմատ տնտեսական բարձր աճ կապահովեն Վրաստանն (5.2%) ու Ադրբեջանը (7.1%): Գնաճի անկում կանխատեսվում է նաև Վրաստանում (այս տարվա 9.6%-ից հաջորդ տարի կիջնի 5.0%-ի), իսկ ահա Ադրբեջանում սպառողական գները կբարձրանան (այս տարվա 9.3%-ից հաջորդ տարի հասնելով 10.3%-ի): Գործազրկությունը 2012-ին նույն մակարդակի (6.0%) կպահպանվի նաև Ադրբեջանում, իսկ Վրաստանում որոշակի անկում է կանխատեսվում (այս տարվա 16.2%-ից հաջորդ տարի կնվազի մինչև 16.0%):
