Հայաստանը բարելավել է իր դիրքերը «Տնտեսական ազատության ինդեքս-2011»-ում, որը հրապարակվել է ամերիկյան The Heritage Foundation ուսումնասիրությունների կենտրոնի և The Wall Street Journal թերթի կողմից:
Եթե անցած տարի ՀՀ-ն զբաղեցնում էր 38-րդ տեղը, ապա այս տարի 36-րդն է:
Ուսումնասիրության համաձայն՝ Հայաստանի տնտեսական ազատության ինդեքսը կազմում է 69.7, որը, անցած տարվա համեմատ, 0.5 բալով ավելի է: Դրա հետ մեկտեղ Հայաստանը զբաղեցնում է 19-րդ տեղը Եվրոպայի 43 երկրների շրջանում: Այս գնահատականը երկրի տնտեսությունը դնում է միջինից բարձր` աշխարհում և տարածաշրջանում:
Մասնավորապես ՀՀ-ն ԱՊՀ երկրների մեջ համարվում է ամենաազատ տնտեսություն ունեցող երկիրը:
Մեկնաբանելով վարկանիշը` հրատարակությունը նշում է, որ վերջին 10 տարիների ընթացքում շուկայի լիբերալացումը և սեփականաշնորհումը վերածնել են երկրի տնտեսությունը: Չնայած տնտեսական աճի տեմպի դանդաղեցմանը վերջին տարիներին, ՀՀ-ում մակրոտնտեսկան միջավայրը ցուցաբերել է հաստատուն տնտեսական աճ` ցածր հարկերի և կառավարության կայուն ծախսերի շնորհիվ:
Հայաստանի տնտեսության ազատականացման հետագա աճը կպահանջի ավելի խոր ինստիտուցիոնալ փոփոխություններ, որոնք ներառում են սեփականության իրավունքների ավելի արդյունավետ պաշտպանություն և դատական համակարգի ամրապնդում:
Խնդիրների շարքում նշվում է կոռուպցիան, որը մնում է տնտեսության շատ հատվածներում: Չնայած համեմատաբար ցածր հարկերին՝ հարկերից խուսափումը առաջ է բերում ավելի մեծ անհանգստություն,- կարծում են Heritage Foundation-ի փորձագետները:
