«Եթե մենք 49 տարվա համաձայնագիր կնքեցինք և մեր անվտանգության երաշխիքները կապեցինք այդ քաղաքական ուղղության և այդ զորքերի հետ, եթե ինքնաթիռը վայրէջք է կատարում Հայաստանի Հանրապետությունում և սահմանապահ ուղեկալում քեզ ռուսն է դիմավորում, ապա այդ տրամաբանության մեջ սա բացատրելի է»,- լրագրողների հետ հանդիպման ժամանակ անդրադառնալով ՀՀ անկախության քսանամյակին նվիրված զորահանդեսին ռուսական զորամիավորումների մասնակցությանը՝ կարծիք հայտնեց ԱԺ ՀՅԴ խմբակցության պատգամավոր Լիլիթ Գալստյանը:
Իսկ ԱԺ «Ժառանգություն» խմբակցության քարտուղար Լարիսա Ալավերդյանն էլ ասաց, որ նույն այդ տրամաբանության մեջ նրանց մասնակցությունը նաև մերժելի է. «Ինձ համար ընկալելի չէ այդ հանգամանքը: Այո, մենք իրենց հետ ունենք պայմանագիր, այդ ամենը աշխատանքային ռեժիմի մեջ է կարգավորվում, ոչ ավելին»:
Ալավերդյանը նկատեց, որ բոլորովին այլ բան է, երբ մենք ցանկանում ենք ցույց տալ մեր հարևաններին, որ մենակ չենք, բայց, ըստ նրա, մեր տոնին մասնակցելը մերժելի է. «Դա Սովետական միությունից մնացած ռուդիմենտ է ` բոլորն հավասար են, բայց մեկն ավելի հավասար է»:
Պատգամավորը նկատեց, որ մենք պետք է ոչ թե անկախություն ձեռք բերենք ֆորմալ առումով, այլ պետք է նաև մեր հոգիները ազատենք ստրկամիտ, մեծ եղբոր ընկալումներից:
Լիլիթ Գալստյանն էլ արձագանքեց, որ հավասար լինելու համար երկրի ներսում պետք է ներքին համախոհություն, ներքին պինդ ողնաշար, լեգիտիմ իշխանություն ունենալ. «Իսկ երբ դու դրանք չունես և այդքան խոցելի ես, ստիպված քաղաքականության մեջ ևս դիմում ես «սվադեբնի գեներալներին»: Պետության ուժը նաև սեփական ազգի հոգեբարոյական վիճակն է` այսօր մենք Արցախում ունենք հաղթանակ, բայց այն կարծես թե շատերիս համար լուծ է դարձել, մեր բանակում գրեթե յուրաքանչյուր ամիս արձանագրվող թիկունքային զոհեր, չպաշտպանված իրավունքներ և այս պարագայում քո պետությունը կոմպլեքսավորված է»:
