Մարտի 24-ին Հայաստանյայց Առաքելական Սուրբ Եկեղեցին տոնախմբել է Տեր Հիսուս Քրիստոսի Երուսաղեմ հաղթական մուտքի հիշատակը` Ծաղկազարդը: Տոնը տարիներ առաջ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ հռչակվել էր մանուկների օրհնության օր: Այս կապակցությամբ առավոտյան ժամերգության ավարտին՝ Մայր Աթոռի շրջափակում, Ամենայն Հայոց Հայրապետի հանդիսապետությամբ կատարվել է Անդաստանի արարողություն և մանուկների օրհնության կարգ:
Նորին Սրբությունն իր օրհնությունն է բաշխել Մայր Աթոռում համախմբված մանուկներին, իսկ հավատացյալներին բաժանվել են Անդաստանի ընթացքում օրհնված ուռենու ճյուղերը: Բերկրաշատ տոնի առիթով Մայր Աթոռ Սուրբ Էջմիածնի միաբանությունը Պատարագի սրբազան արարողությանը մասնակցել է Սուրբ Գայանե վանքում: Պատարագիչն էր Գևորգյան հոգևոր ճեմարանի ասպիրանտուրայի բաժնի ղեկավար Գերաշնորհ Տ․ Դանիել եպիսկոպոս Ֆընտըգյանը։
Դանիել Սրբազանը, անդրադառնալով օրվա խորհրդին, խոսել է անցնող շաբաթների նշանակության մասին` ընդգծելով, որ յուրաքանչյուր կիրակի կարևոր հանգրվան է Եկեղեցու և հավատացյալի կյանքում, իսկ Ծաղկազարդի խորհրդով դուռ է բացվում դեպի մեր Փրկչի Հարության տոնակատարություններ։ Վերջում պատարագիչ Սրբազանը աղոթք վերառաքելով առ Աստված՝ դիմել է հավատավոր ժողովրդին՝ հորդորելով Ծաղկազարդի խորհրդով լցված ընթանալ փրկություն ճանապարհով։
Սուրբ Պատարագի ավարտից հետո Մայր Տաճարի զանգակատան առջև համախմբվել էին հայաստանյան տարբեր թեմերից ուխտավորաբար Մայր Աթոռ ժամանած շուրջ 600 արցախցիներ։ Արցախի թեմի առաջնորդ Գերաշնորհ Տ․ Վրթանես եպիսկոպոս Աբրահամյանի հանդիսապետությամբ կատարվել է մանուկների օրհնության կարգ, որից հետո նրանց ընծայվել է Աստվածաշունչ մատյաններ, աղոթագրքեր և խաչեր։ Արցախցի մանուկների և նրանց ընտանիքների համար Մայր Աթոռի միաբանական սեղանատանը կազմակերպվել է հյուրասիրություն, իսկ Էջմիածնի հայորդյաց տանը՝ համերգային ծրագիր։
