Հոկտեմբերի 27-ի գործով ցմահ ազատազրկման դատապարտված Նաիրի և Կարեն Հունանյանների դիմումը` իրենց պատիժը վերանայելու և Քրեական օրենսգրքում 23.05.2011թ. կատարված փոփոխություններին համապատասխանեցնելու պահանջով, այսօր մերժվել է դատարանի կողմից:
Հունանյանների պաշտպան Տիգրան Գրիգորյանը նշել է, որ օրենքը թույլ է տալիս, որ իր պաշտպանյալների նկատմամբ կիրառված ցմահ ազատազրկումը փոխարինվի 20 տարվա ազատազրկմամբ։ Սակայն դատարանը իր մերժումը հիմնավորել է այն հանգամանքով, որ Հունանյանները կատարել են հանրության համար վտանգավոր արարք և ստացել են համարժեք պատիժ:
Նշենք, որ նման պահանջով դատարան է դիմել նաև Հոկտեմբերի 27-ի գործով ցմահ ազատազրկման դատապարտված Էդիկ Գրիգորյանը: Նա նաև դիմում է ներկայացրել, որպեսզի լսումներին ներկա լինեն նաև ինքն ու իր պաշտպանը։ Նիստի օրվա մասին Գրիգորյանի փաստաբանը դեռևս գրություն չի ստացել:
