Ռուսաստանի վարչապետ Վլադիմիր Պուտինն այսօր իր հիացմունքն է հայտնել Իտալիայի վարչապետ Սիլվիո Բեռլուսկոնիի գործողություններով` նշելով, որ նա տղամարդավարի ընդունում է ոչ ամբոխահաճո որոշումներ երկիրը տնտեսական ճգնաժամից հանելու համար: «Ինչքան էլ պարոն Բեռլուսկոնիին քննադատեն հակառակ սեռի նկատմամբ ունեցած սիրո համար (ի դեպ, քննադատում են նախանձից ելնելով), բայց նա այս լարված իրավիճակում իրեն դրսևորել է որպես պատասխանատու քաղաքական գործիչ՝ բառի բուն իմաստով»,- ասել է Պուտինը Սոչիի ներդրումային ֆորումի ժամանակ: Այս մասին հաղորդում է Interfax գործակալությունը:
«Ես հետևում էի նրան և ուրախանում նրա համար: Այո, իհարկե, շատերին դուր չի գալիս, սակայն այլ ելք չկա: Բոլորը գիտեն, թե ինչ է պետք անել նման իրավիճակում, սակայն ոչ բոլորն են քաջություն ունենում գնալ նման որոշումների»,- ասել է Պուտինը: Հիշեցնենք նաև, որ սա առաջին դեպքը չէ, երբ Պուտինն իր հրապարակային ելույթներում աջակցություն է հայտնում Իտալիայի վարչապետին, իսկ Բեռլուսկոնին էլ համարվում է Եվրոպայում Ռուսաստանի վարչապետի թիվ մեկ դաշնակիցը: