Սերժ Սարգսյանը երեկ հերթական կադրային փոփոխությունն է կատարել, ինչը, ըստ տարածված տեղեկությունների, պայմանավորված է ԿԸՀ նախագահ Գարեգին Ազարյանի անժամանակ մահով: Բանն այն է, որ Սերժ Սարգսյանը պաշտոնանկ է արել Վերաքննիչ դատարանի նախագահ Տիգրան Մուկուչյանին, և խոսակցություններ են շրջանառվում, որ Մուկուչյանը նշանակվելու է ԿԸՀ նախագահ: Մի՞թե Սերժ Սարգսյանը չգտավ ԿԸՀ նախագահի մի այնպիսի թեկնածուի, որի համար ստիպված չլիներ ևս մի բաց փակել:
Այսինքն` մի՞թե հնարավոր չէր գտնել մեկ ուրիշին և Վերաքննիչ դատարանի նոր նախագահ նշանակելու խնդիր չունենալ: Սակայն, ըստ երևույթին, խնդիրն այն է, որ Սերժ Սարգսյանը երևի թե ավելի վաղ է ունեցել Վերաքննիչի նոր նախագահի նշանակման մտադրություն, և պարզապես ԿԸՀ նախագահի մահը առիթ է հանդիսացել ԿԸՀ նախագահի պաշտոնի թափուր լինելու հիմքով փոփոխություն կատարել նաև Վերաքննիչ դատարանում: Այդպիսով, հարցն այն է, թե արդյոք ո՞ր մեկն է Սերժ Սարգսյանի համար առավել կարևոր նախընտրական փուլին ընդառաջ` Վերաքննիչ դատական համակա՞րգը, թե՞ Կենտրոնական ընտրական հանձնաժողովը:
Ակնհայտ է, որ ընտրական գործընթացում երկու համակարգերն էլ բավականաչափ աշխատանք են ունենալու անելու: Պարզապես հետաքրքիր է, թե Տիգրան Մուկուչյանի շնորհիվ Սերժ Սարգսյանն ամրացնում է ԿԸ՞Հ համակարգը, թե՞ նրան ԿԸՀ նախագահ նշանակելու պատրվակով ազատում է Վերաքննիչի նախագահի պաշտոնից և ծրագրում նոր նշանակումով ուժեղացնել և ամրացնել Վերաքննիչ դատական համակարգը: Այդ տեսանկյունից հետաքրքրական կլինի, թե Սերժ Սարգսյանն ում է նշանակելու Վերաքննիչ դատարանի նախագահ: Դա երևի թե որոշակի պարզաբանումներ կմտցնի իրավիճակում: Ակնհայտ է կարծես թե մի բան, որ Սերժ Սարգսյանը հնարավոր ամեն առիթ օգտագործում է ներիշխանական վերադասավորումների համար, և Վերաքննիչ դատարանի նախագահի փոփոխությունը հենց դրա վկայությունն է, քանի որ կասկած չկա, որ Վերաքննիչի նոր նշանակումը շատ բանով մեսիջ է լինելու նաև Ընդհանուր իրավասության դատարաններին:
Այսինքն` այդ որոշման դոմինոյի առնվազն հոգեբանական էֆեկտը դատական համակարգի վրա բավական զգալի է լինելու: Իսկ դատական համակարգը ըստ ամենայնի առավել մեծ դեր է ունենալու առաջիկա ընտրական գործընթացներում, քանի որ նկատելի է, թե ինչպես է Հայաստանի քաղաքական կյանքում մեծանում իրավական շեշտադրումների չափաբաժինը:
