Սեպտեմբերի 18-ին Ախթալայում անցկացվելիք խորովածի փառատոնի շրջանակում տեղի կունենա սիրված դերասան Արմեն Ջիգարխանյանի արձանի բացումը: Դերասանը պատկերված է խորովածի շիշը ձեռքին: Ի դեպ, փառատոնը կրում է «Երբ գալիս է սեպտեմբերը» խորագիրը: Այս մասին լրագրողների հետ հանդիպմանն ասաց «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը: Նրա խոսքով` այս պահի դրությամբ դերասանը տվել է իր համաձայնությունը` մասնակցել փառատոնին, միջոցառմանը ներկա է գտնվելու հայտնի բռնցքամարտիկ Վիկ Դարչինյանը:
Բավական ներկայացուցչական խումբ է ժամանելու նաև հարևան Վրաստանից` Ախթալա են գալու Վրաստանի լեգենդար ֆուտբոլիստները, որոնք ընկերական հանդիպում կունենան հայ սիրված ֆուտբոլիստների հետ, վրացի շոու-բիզնեսի ներկայացուցիչներ, Վրաստանի նախագահ Միխեիլ Սաակաշվիլիի խորհրդականը, Վրաստանի երկու մարզի մարզպետները: Միջոցառումն իրենց ներկայությամբ պատվելու են նաև հայ ծանրամարտիկները:
Տոնակատարության շրջանակում ելույթ կունենան «Կարին», «Սասուն» պարի համույթները, սիրված երգիչ-երգչուհիներ, այդ թվում` Լեյլա Սարիբեկյանը, Մկրտիչ Մկրտչյանը, Դավիթ Ամալյանը:
Փառատոնը նվիրվում է Հայաստանի անկախության 20-ամյակին: Փառատոնից հետո հրատարակվելու է գիրք, ու նկարահանվելու է վավերագրական ֆիլմ խորովածի մասին:
