Բաքվի մամուլը քննարկում է արտահերթ նախագահական ընտրությունների թեման: Տեսակետ են արտահայտել ընդդիմադիր «Մուսավաթ» եւ Ժողովրդական ճակատ կուսակցության առաջնորդները: Տպավորություն է, որ Ալիեւի որոշումը նրանց համար անակնկալ չէ, եւ իրենք չեն մասնակցի ընտրություններին: Քննադատություն, իհարկե, կհնչի, մեղադրանքներ կներկայացվեն, բայց իշխանության համար իրական պայքար չի սկսվի: Ըստ երեւույթին, այդ ուժերի ժամանակն անդարձ հեռացել է: Դատելով մամուլի մի շարք հրապարակումներից, այս անգամ իշխանության մրցակից կկարգվի Real շարժման առաջնորդ Իլգար Մամեդովը: Վերջինս ունի Մեհրիբան Ալիեւայի քաղաքական պրոյեկտի համարում:
Մերձիշխանական հայտնի լրատվամիջոցը նախագահական արտահերթ ընտրությունների անցկացումը պայմանավորել է երկու հանգամանքով՝ ԱՄՆ-ում նախագահական ընտրություններից մեկ տարի առաջ Ադրբեջանում ապահովել լեգիտիմ իշխանության կազմավորումը եւ «հընթացս պարզել, թե ինչ զարգացում կունենա ԱՊՀ փորձի հիման վրա դրսեւորված դինաստիական կառավարումը»: Իլհամ Ալիեւը իշխանությունը ժառանգել է հորից, բայց այն որդուն փոխանցելու ժամանակը դեռեւս չի եկել. կրտսեր Հեյդար Ալիեւը մոտ մեկ տասնամյակ պետք է սպասի, որպեսզի լրանա նախագահի թեկնածուի համար սահմանադրությամբ սահմանված նրա տարիքը:
Ադրբեջանցի մի շարք փորձագետներ չեն բացառում, որ նախագահական արտահերթ ընտրություններին զուգահեռ կարող է անցկացվել սահմանադրական փոփոխությունների հանրաքվե: Նման քննարկումներ ընթացել են քառասունչորսօրյա պատերազմին նախորդած շրջանում, երբ ստեղծվեց առաջին փոխնախագահի պաշտոն, եւ Մեհրիբան Ալիեւան նշանակվեց իշխանության երկրորդ դեմք: Կարծիք կար, որ Միլլի մեջլիսը կընդունի «Ազգային առաջնորդի մասին» օրենք, Իլհամ Ալիեւը կօժտվի այդ կարգավիճակով, իսկ նախագահի պաշտոնը կանցնի Մեհրիբան Ալիեւային:
ԱՊՀ ում դրսեւորված «դինաստիական կառավարում» ասելով ի՞նչ նկատի ունի ալիեւյան քարոզչամիջոցը: Մի նաախդեպ կար Ղազախստանում, երբ իշխանությունը Տոկաեւին փոխանցելով՝ Նազարբաեւն իր համար ստեղծել էր «էլբասիի»՝ ազգի ղեկավարի եւ ցմահ սենատորի կարգավիճակ, բայց այսօր թե մեկից, թե մյուսից զրկված է: Երկրորդը Թուրքմենստանի օրինակն է: Նախագահ Բերդիմուհամեդովը պաշտոնը փոխանցել է որդուն, բայց ընտրվել խորհրդարանի նախագահ եւ փաստացի հանդիսանում է երկրի առաջնորդ: ԱՊՀ-ում քաղաքական երկարակյացներ են ՌԴ, Բելառուսի եւ Տաջիկստանի նախագահները: »
«Դինաստիական կառավարում» ապահովելու համար հնարավո՞ր է, որ Ալիեւն իշխանությունը փոխանցի տիկնոջը, իսկ ինքն ստանա «համազգային առաջնորդի» կարգավիճակ: Այդ կոչումն այսօր տրված է Հեյդար Ալիեւին, իշխանության սիմվոլիկայում նա ներկա է: Կլիմայի փոփոխության հարցերով միջազգային խորհրդաժողովին Ալեւին ուղեկցում էր ավագ դուստրը, որ պանելային քննարկումներից մեկին հանդես է եկել որպես հիմնական զեկուցող: Գուցե դա նրան ներկայացնելու համա՞ր է արվել:
Կարելի է ամենատարբեր ենթադրություններ անել, բայց ամեն դեպքում «դինաստիական կառավարում» ապահովելու մասին մերձիշխանական լրատվամիջոցի դիտարկումն անտեսելի չէ: Բաքվից տեղեկատվական նման ազդակ առանց Իլհամ Ալիեւի աշխատակազմի թույլտվության չէր արվի:
