Լուսանկարը՝ Armeniasputnik-ի
Նոյեմբերի 28-ին Հայաստանի ԱԽ քարտուղար Արմեն Գրիգորյանը կմեկնի Վրաստան, որտեղ, ըստ տեղեկության կունենա աշխատանքային հանդիպումներ: Արմեն Գրիգորյանի Վրաստան այցն ուշադրության է արժանի երկու հանգամանքի ֆոնին: Օրեր առաջ Վրաստանի վարչապետ Իրակլի Ղարիբաշվիլիին Ադրբեջանի նախագահ Ալլիեւը հրավիրել էր Բաքու՝ Կենտրոնական Ասիայի տնտեսական հեռանկարների հետ կապված համաժողովին մասնակցելու նպատակով: Նախօրեին էլ Բաքվում տեղի ունեցավ Վրաստանի, Ադրբեջանի եւ Թուրքիայի պաշտպանության նախարարների եռակողմ ձեւաչափի հանդիպումը, որից հետո կողմերը հայտարարել էին գործակցությունը խորացնելու հաստատակամության մասին, այդ կերպ սպասարկվող նպատակների շարքում նշելով նաեւ «ռեգիոնալ կայունությունը»:
Այդ ձեւակերպումն անշուշտ ենթակա է բավականին լայն մեկնաբանության: Բայց, այդ շրջանակում արժե դիտարկել նաեւ այն դժգոհություը, որ Ադրբեջանը արտահայտում էր Ֆրանսիայից Հայաստան ռազմական բեռների՝ Վրաստանի տարածքով տարանցման առնչությամբ, հայտարարելով, թե Ֆրանսիայի այդ մատակարարումները սպառնալիք են ռեգիոնալ կայունությանը: Նախօրեին անդրադառնալով պաշտպանության նախարարների այդ եռակողմ հանդիպմանը, նշել էի, որ դրանում անկասկած տեղ կունենա նաեւ այդ հարցն ու Բաքուն եւ Անկարան կփորձեն օգտագործել Վրաստանի հանդեպ իրենց ազդեցությունը՝ իրավիճակը այսպես ասած իրենց պատկերացումների շրջանակում պահելու համար: Բաքվում եռակողմ այդ հանդիպումից հետո Հայաստանի ԱԽ քարտուղարի այցը Երեւանի համար կարող է լինել հնարավորություն հավաստիանալու, որ տարանցման ռեժժիմի առնչությամբ Վրաստանը չունի տրամադրությունների կամ մտադրությունների փոփոխություն:
Միեւնույն ժամանակ, Վրաստանի առնչությամբ կա իհարկե նաեւ «զուգահեռ գիծը», որտեղ արդեն Թբիլիսին ոչ միայն հայ-ֆրանսիական ռազմատեխնիկական գործարքի լոգիստիկայի առանցքային մաս է, այլ նաեւ հայ-ադրբեջանական եւ հայ-թուրքական քննարկումների որոշակի, այսպես ասած ոչ ֆորմալ հարթակ: Այդ իմաստով էլ ուշագրավ է այն, որ Հայաստանի ԱԽ քարտուղարը Թբիլիսի մեկնում է մի քանի օր անց այն բանից, երբ Հայաստանը հայտարարեց, որ Ադրբեջանին է փոխանցել խաղաղության պայմանագրի վերաբերյալ իր առաջարկները՝ ի պատասխան Ադրբեջանի, դեռեւս սեպտեմբերին փոխանցած առաջարկների: Չի բացառվում, որ Հայաստանի ԱԽ քարտուղարը Վրաստանում կարող է ծանոթանալ Ադրբեջանի առնվազն նախնական արձագանքին:
