Մամուլում հրապարակվել է Բաքվում Իրանի դեսպանի սոցցանցային գրառումը, որտեղ նա Ադրբեջանի ժողովրդին անվանում է «խիզախ եւ պատվախնդիր» եւ ավելացնում, որ այդ ժողովուրդը «սիոնիստական ռեժիմը ատում է՝ ինչպես աշխարհի բոլոր մուսուլմանները»: Ադրբեջանցի մի շարք փորձագետներ տարակուսանք են հայտնել, որ ալիեւյան ԱԳՆ-ն ոչ միայն Իրանի դեսպանին չի հրավիրել եւ բողոք չի հատնել դիվանագիտական այդ աննախադեպ քայլի կապակցությամբ, այլեւ առհասարակ վերաբերմունք չի արտահայտել: Հետեւել է իրանցի դիվանագետի երկրորդ գրառումը, որտեղ նա Իսրայելի պաշտպանական, բայց հատկապես հակաօդային համակարգը համեմատել է սարդոսայնի հետ եւ ծաղրել ՀՕՊ «Երկաթե գմբեթը»՝ ակնարկելով, որ եթե ՀԱՄԱՍ-ի արձակած հրթիռների դեմ արդյունավետ համազդեցություն չկա, ապա միայն կարելի է պատկերացնել, թե ինչ կսպասի Իսրայելին, եթե Իրանը գործի դնի իր հրթիռային զինանոցը:
Այս գրառմանն ի պատասխան Բաքվում Իսրայելի դեսպանը իրանցի դիվանագետին հիշեցրել է, որ սարդոստայնի «մետաքսը մի քանի անգամ երկաթից ամուր է»: Բաքվի փորձագիտական հանրությունը կարծում է, որ Պաղեստինի հարցում Ադրբեջանը «դիրքորոշում է փոխել»: Հակառակ դեպքում, նրանց կարծիքով, իշխանությունը դիվանագիտական խողովակներով կկանխեր իրանա-իսրայելական բաց առճակատումը: Ի՞նչ կողմնորոշում ունի կամ առաջիկայում կդրսեւորի Բաքուն՝ կապված իսրայելա-պաղեստինյան կարգավորման հետ, առայժմ, կարծես, կանխատեսելի չէ:
Տեղեկություն կա, որ նոյեմբերի 12-ին Սաուդյան Արաբիայում կգումարվի Իսլամական համագործակցության կազմակերպության խորհրդաժողով: Ավելի վաղ Սաուդյան Արաբիան հյուրընկալել էր կազմակերպության անդամ երկրների արտաքին գործերի նախարարներին, բայց որեւէ որոշում չէր հրապարակվել: Irna գործակալությունը հայտնում է, որ Իրանի նախագահն այդ օրը կմեկնի Սաուդյան Արաբիա: Կգումարվի՞ Իսլամական համագործակցության կազմակերպության գագաթնաժողով: Ադրբեջանը այդ կազմակերպության անդամ է եւ Լեռնային Ղարաբաղի հարցում միշտ քաղաքական աջակցություն է ստացել: Կմեկնի՞ Իլհամ Ալիեւը Սաուդյան Արաբիա:
