Մարտի 1-ի էջը չի փակվել, նման մեկնաբանություններ անողները կտրել են կոնտեքստից երկու բառ. այս մասին մեզ հետ զրույցում նշեց ԱԺ ՀՀԿ-ական պատգամավոր, ԵԽԽՎ հայաստանյան պատվիրակության ղեկավար Դավիթ Հարությունյանը:
-Պարո՛ն Հարությունյան, ԵԽԽՎ Մոնիթորինգի հանձնաժողովը նախագիծ ընդունեց, որում ասվում է, որ պետք է փակել Մարտի 1-ի էջը: Ի՞նչ է արվել այդ ուղղությմաբ, ո՞վ է պատժվել: Ի՞նչ կապ ունի այստեղ երկխոսությունը, չէ՞ որ մարդիկ են մահացել:
-Ես համարում եմ, որ, նման մեկնաբանություն անողները, ցավոք սրտի, կտրել են կոնտեքստից երկու բառ: Բանաձևը պետք է կարդալ ծայրից ծայր, և այդ դեպքում պարզ կդառնա, որ քրեական հետապնդումը շարունակվելու հարցը որևէ հարցականի տակ չի առնվում: Հակառակը` Վեհաժողովը ողջունում և հորդորում է` ավելի ինտենսիվացնել այդ գործընթացը:
-Ուզում եք ասել, որ դրանով Մարտի 1-ի էջը չի՞ փակվում:
-Նորից կտրում եք կոնտեքստից ասածը, նայած, ինչ տեսանկյունից եք նայում, եթե խնդիրը վերաբերում է քրեական հետապնդմանը` ամենևին ոչ, և այդ առումով աշխատանքը պետք է շարունակվի:
-Երկխոսության հարցով ի՞նչ հեռանկար եք տեսնում, այն կշարունակվի՞, թե՞ ոչ:
-Ինձ դժվար է կանխատեսումներ անել: Հարցը ուղղեք ՀԱԿ-ին:
-Դե ՀԱԿ-ն ասում է, երբ Տիգրան Առաքելյանն ազատ արձակվի, նոր կշարունակի երկխոսությունը:
-Մեր դիրքորոշումը մնում է նույնը, ինչ ասվում էր մեր վերջին հայտարարության մեջ:
