Այսօր ԵՊՀ գիտխորհրդի դահլիճում մեկնարկեց «Մարդու իրավունքներ և ժողովրդավարացում» տարածաշրջանային մագիստրոսական ծրագրի առաջին դասընթացը: Բացելով այն` ծրագրի ղեկավար Արթուր Ղազինյանն ասաց, որ ծրագիրն իր նախադեպը չունի մեզանում, իսկ Հայաստանում Եվրոպական Միության պատվիրակության ղեկավար Ռաուլ դե Լուցենբերգերն էլ հավելեց, որ մայիսի 21-ին իրենց հաջովեց դրական պատասխան ստանալ ծրագրի մեկնարկի մասին: Բավական մեծ պատասխանատվություն կա: 2007թ. պայմանագիր ստորագրվեց ԵՊՀ ռեկտորի հետ, ու սկսվեցին ծրագրի նախապատրաստական աշխատանքերը, որոնք ավարտվեցին հաջողությամբ:
Նրա խոսքով` ծրագրի մասնակից չորս պետությունների թիվը վերջնական չէ, և նպատակ կա ընդյալնել մասնակից երկրների աշխարհագրական կազմը: Նա հույս հայտնեց, որ հետագայում դրան կմասնակցեն Իրանը Թուրքիան, Վրաստանը, Ադրբեջանը: «Սա ուսումնական կուրս է, որն առաջին անգամ է բացվում նախկին խորհրդային հանրապետությունում: Ուրախ եմ, որ մի քանի ամիս առաջ սկսած աշխատանքը տվեց լուրջ արդյունք ու մեծ հետաքրքրություն առաջացրեց ուսանողների շրջանում»,- ասաց Ռաուլ դե Լուցենբերգերը:
Եվրոպայի խորհրդում Հայաստանի մշտական ներկայացուցիչ Զոհրաբ Մնացականյանն էլ նշեց, որ թեև նոր է տեղեկանում ծրագրի մասին, սակայն շատ ուրախ է` իմանալով դրա մեկնարկի մասին: Ելույթ ունեցավ նաև ԵՊՀ ռեկտոր Արամ Սիմոնյանը, ով իր ելույթում կարևորեց ծրագրի մեկնարկը ու ներկայացրեց այն: ՄԱԿ-ի հայաստանյան գրասենյակի ներկայացուցիչ Արմեն Բայբուրդյանն էլ նկատեց, որ մագիստրոսական կուրսի բացումը նվաճում է Հայաստանի համար, որի սահմանները չեն սահմանափակվում միայն ԵՊՀ-ի շրջանակում:
2010թ. հիմնադրված ծրագիրն իրականացվում է Եվրոպական միության աջակցությամբ, անցկացվում է Հայաստանում, Բելառուսում, Մոլդովայում ու Ուկրաինայում:
Ծրագրի մասնակիցները հնարավորություն կունենան Երևանում մեկ տարի սովորելուց հետո գնալ ու ուսումը շարունակել Ուկրաինայի, Բելառուսի, Մոլդովայի համալսարաններում: Ծրագիրը` Եվրահանձնաժողովի աջակցությամբ, աշխարհի տարբեր մասերում հիմնադրված «Մարդու իրավունքներ և ժողովրդավարացում» տարածաշրջանային մագիստրոսական ծրագրերից վեցերորդն է, որը ներառում է ԵՄ Արևելյան գործընկերության տարածաշրջանը: Դրամաշնորհի ընդհանուր արժեքը 1 276 000 եվրո է, գործողության ժամկետը` երեք տարի:
Ծրագիրն ունի 23 մասնակից` 6 երկրներից, նրանցից 11-ը Հայաստանից են:
Ելույթ ունեցան նաև ծրագրի մասնակից ուսանողները:
