Ադրբեջանական լրատվամիջոցները հայտնել են, որ Իլհամ Ալիևը հրաժարվել է Գրանադայում հնգակողմ հանդիպումից: Ըստ այդ տեղեկության, Ադրբեջանը պայման է առաջ քաշել, որ հանդիպմանը ներկա լինեն նաև Թուրքիայի ներկայացուցիչներ, ինչին սակայն չեն համաձայնել Ֆրանսիան ու Գերմանիան: Այն, որ Ադրբեջանը հնգակողմ ձևաչափին մոտենում է այսպես ասած վեևապահումով, պարզ էր դեռևս հունիսի 1-ին տեղի ունեցած առաջին հանդիպումից առաջ, երբ Բաքուն հայտարարեց, թե հնգակողմ այդ հանդիպմանն իր մասնակցության վերջնական համաձայնություն դեռ չկա: Իհարկե հետո այդ համաձայնությունը եղավ ու հանդիպումը կայացավ: Այժմ, գոնե առայժմ, Ադրբեջանը հրաժարվում է և պարզ չէ, արդյո՞ք մինչ այդ կփոխվի այդ դիրքորոշումը, թե՞ այն վերջնական է:
Եթե Բաքուն չի գնում Գրանադայի հանդիպման, ապա դա նշանակում է, որ գնում է իրավիճակի սրացման: Հավանաբար նաև հենց դրանով էին պայմանավորված Հայաստան Ֆրանսիայի արտգործնախարարի այցը, և Հայաստանի ԱԽ քարտուղարի այցն Իրան, ընդ որում բավականին հագեցած և ներկայացուցչական հանդիպումներով այցը, ընդհուպ Իրանի նախագահի և ԶՈՒ ԳՇ պետի հետ հանդիպումներ: Ի դեպ, Իրանի ԶՈՒ ԳՇ պետը, ըստ իրանական լրատվամիջոցների, հայտարարել է, որ Իրանը պատրաստ է դիտորդներ ուղարկել Հայաստանի և Ադրբեջանի սահման: Սա ըստ ամենայնի այլ բան չէ, քան Երևանի առարկայական մտահոգություններին Իրանի պատասխան: Գրանադայում հանդիպումից Ալիևի հրաժարվելուց հետո Երևանը թերևս պետք է լրջորեն դիտարկի այդ պատասխանը, որպես Հայաստանի հանդեպ նոր ռազմական գործողությունների հակազդման առավել օպերատիվ և արդյունավետ միջոց:
