Նախագահի աշխատակազմի ղեկավար Կարեն Կարապետյանի հրաժարականը Հովիկ Աբրահամյանը համարում է «անակնկալ եղելություն»: Այս մասին այսօր լրագրողների հետ հանդիպմանը նշեց ԱԺ նախագահը, միաժամանակ հայտնելով, որ վարչապետ դառնալու մտադրություն չունի, իսկ վարչապետի գործունեությունը համարում է «բարձր»: Աբրահամյանի տեսակետը կներկայացնենք ավելի ուշ:
Ինչ վերաբերում է «Վիկիլիքսի» բացահայտումներին` ԱԺ նախագահը խորհուրդ տվեց այն քաղաքական գործիչներին, ովքեր խոսում են պատերի տակ ժողովրդի հետ կամ այլ քաղաքացու հետ, թող միշտ հիշեն, որ կարող է իրենց մտքերը հանրության համար հասանելի լինեն, և դրա համար հորդորեց որ բոլորն իրենց խոսքերում լինեն չափավոր: Հիշեցնենք, որ «Վիկիլիքսը» հրապարակել էր ամերիկյան դիվանագիտության գրությունները, որտեղ ներկայացվում էր Հայաստանի ներքին և արտաքին խնդիրների վերաբերյալ վերջիններիս և Հայաստանի տարբեր քաղաքական գործիչների միջև տեղի ունեցած խոսակցությունները:
Ինչ վերաբերում է ԱԺ նախագահի վերաբերյալ հրապարակմանը Աբրահամյանն ասաց. «Ես պատասխանել եմ, հերքել եմ, որ փոխդեսպանի հետ որևէ անգամ հանդիպում չեմ ունեցել, ուրեմն չէր կարող լինել որևէ խոսակցություն»:
