Կտեսնենք համապետական հեռարձակողների ավելի քիչ մասնացություն գալիք ընտրություններին: Այսօր «Առաջին լրատվական»-ի հետ զրույցում նման կարծիք հայտնեց Երևանի մամուլի ակումբի նախագահ Բորիս Նավասարդյանը` խոսելով գալիք ընտրություններում լրատվամիջոցների ներգրավվածության մասին: Բ. Նավասարդյանի հավաստմամբ` վերջին՝ 2008 թվականի ընտրություններից հետո շատ բան է փոխվել, և այսօր հստակ տարբերություններ կան համապետական և տեղական հեռարձակողների միջև:
«Հիմա փոխվել է այն, որ անցել է հերթական հեռարձակման լիցենզավորման մրցույթը, և այն հեռուստաընկերությունները, որոնք այսօր դաշտում են, որոշ չափով տարբերվում են նախորդներից: Այսօր հստակ տարբերություն է զգացվում համապետական հեռարձակողների և տեղական հեռարձակողների միջև, նկատի ունեմ նաև նրանց, ովքեր հիմնականում հեռարձակվում են Երևանում և մոտական շրջաններում, իսկ համապետականների մոտ շարունակվել է միտումը տեղեկատվական, հասարակական, քաղաքական հնչեղություն ունեցող հաղորդումները փոխարինել ժամանցային հաղորդումներով»,- վերլուծեց Բ. Նավասարդյանը` կանխատեսելով, որ նրանք առանձնապես ակտիվ չեն լինելու ընտրությունների լուսաբանման մեջ, քանի որ նրանցից յուրաքանչյուրը կենտրոնանալու է այն քաղաքական ուժի ներկայացման, գովազդի վրա, որի ներկայացուցիչն է իր տերը: Նրա կարծիքով` միակ տարբերությունը լինելու է այն, որ համարյա բոլոր հեռուստատեսությունները ունեն տերեր, ովքեր ունեն քաղաքական շահեր, և, բնականաբար, այդ շահերն ավելի հստակ են արտացոլվելու ընտրական շրջանում:
Անդրադառնալով օնլայն լրատվամիջոցների դերին` նա ասաց, որ բավական ակտիվացել է ԶԼՄ-ի դաշտը, և նաև ավելացել է նրանցից՝ որպես տեղեկատվական աղբյուրից, օգտվողների թիվը: «Եթե դիտարկենք մոտակա երկու տարին, առայժմ հեռուստատեսությունները, որպես քարոզչամիջոց, շատ մեծ առավելություն ունեն: Օնլայն լրատվամիջոցների դաշտը շատ խոստումնալից է, բայց երևի կպահանջվի 1-2 տարի, որպեսզի, որպես տեղեկատվության միջոց, փոխարինեն հեռուստաընկերություններին»,- ասաց Երևանի մամուլի ակումբի նախագահը: