Թուրքական Taraf թերթի փոխանցմամբ՝ Իրանից հետո հիմա էլ Թուրքիան է մտադիր ցամաքային հակաահաբեկչական օպերացիա իրականացնել Հյուսիսային Իրաքում գտնվող Ղանդիլի լեռներում, ուր գտնվում են Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) զինյալների ճամբարները։
Թուրքիան պահանջում է Ղանդիլի լեռների մոտ գտնվող Ռայնա ու Չայքուրնա վայրերում իրեն տարածքներ տրամադրել երկու ռազմաբազա կառուցելու համար։ Թուրքական կողմը հուսով է, որ Բաղդադի ղեկավարությունն այդ հարցում չի մերժի իրեն։ Իսկ ահա Հյուսիսային Իրաքի քրդական ինքնավարության վարչակազմը դեռևս հանդես չի եկել այս մասին հայտարարությամբ։
Հիշեցնենք, որ Թուրքիան օգոստոսի 17-ից ավիացիայի և հրետանու միջոցով ռմբակոծում է Հյուսիսային Իրաքում PKK-ի դիրքերը։ Այդ կապակցությամբ Իրաքը բողոքի նոտա էր հղել Թուրքիային, սակայն Թուրքիայի ԱԳՆ-ն պատասխանել էր, որ իրենց ռմբակոծությունները պայմանավորված են նրանով, որ Հյուսիսային Իրաքի քրդական իքնավարությունը չի կարողացել ապահովել տարածաշրջանի անվտանգությունն ու վերահսկողությունը։
