10 տարի անց մեր գնահատականը միանշանակ է՝ ցանկացած ահաբեկչություն, ինչ հիմնավորում էլ այն ունենա՝ լինի կրոնական, լինի ռասայական, լինի քաղաքական, միանշանակ անընդունելի և դատապարտելի է, և ամբողջ աշխարհը պետք է միավորվի ահաբեկչության դեմ պայքարի համար: Եվ պատահական չէ, որ ահաբեկչության դեմ պայքարը աշխարհը միավորող պայքարի կարևորագույն մարտահրավերներից մեկն է:
Այս մասին մեզ հետ զրույցում նշեց ԱԺ ԲՀԿ-ական պատգամավոր Նաիրա Զոհրաբյանը՝ ավելացնելով. «Կրկնում եմ՝ որևէ ահաբեկչություն՝ ինչ հիմք էլ այն ունենա, ինչ շղարշով էլ այն փորձեն ներկայացնել, անգամ ամենավեհ գաղափարներով փորձեն այն արդարացնել՝ միանշանակ դատապարտելի է, և աշխարհը պետք է իրապես միավորվի ահաբեկչության դեմ պայքարում, որովհետև մենք տեսնում ենք, որ ահաբեկչությունը գնալով նոր թափ է ստանում, և մենք պետք է իրապես կարողանանք հստակ, համակարգված և միահամուռ կերպով պայքարել այդ համաշխարհային խոշորագույն աղետներից մեկի՝ահաբեկչության դեմ:
Բնականաբար, այսօր ևս, ինչպես 10 տարի առաջ, մենք ցավում ենք այդ ողբերգության համար, այդ մարդկանց համար, որոնք դարձան այդ ահաբեկչության զոհը»:
Հիշեցնենք, որ 10 տարի առաջ՝ 2001թ. սեպտեմբերի 11-ին, Ալ Կաիդա» ահաբեկչական խմբավորումը հողին հավասարեցրեց Նյու Յորքի Առևտրի համաշխարհային կենտրոնի զույգ երկնաքերները: Սեպտեմբերի 11-ի ահաբեկչական գործողության արդյունքում զոհվեց շուրջ 2974 մարդ, ևս 24-ը անհայտ կորած են:
