Eureporter-ը գրում է․
Մեծ Բրիտանիայի վարչապետ Ռիշի Սունակը ընդգծել է իր կառավարության՝ «Փոխիր, որ թողնես» ծրագրի կարևորությունը հանրային առողջության բարելավման համար: Այն խրախուսում է սիգարետի անծուխ ու անվնաս այլընտրանքները և հանդիսանում է ծխելու դեմ պայքարի ռազմավարության կարևոր մասը։ Ծրագրի նպատակն է խրախուսել չափահաս ծխողներին՝ տեղեկացված ընտրություն կատարել, այլ ոչ թե արգելքներ դնել այլընտրանքների վրա, որը նրանց թողնում է սահմանափակ տարբերակներ․ գրում է քաղաքական խմբագիր Նիք Փաուելը:
Երբ վարչապետ Սունակը Վեսթմինսթերում խոսել է Մեծ Բրիտանիայի առողջապահության ազգային ծառայությունը անընդհատ աճող ճնշումներից ազատելու մասին, նա իր պատասխանի հիմքում դրել է ծխելու դեմ քաղաքականությունը: Մեծ Բրիտանիայում հասկացել և ընդունել են, որ չափահաս ծխողները դժվար թե թողնեն ծխելն՝ առանց նիկոտինի քաղցը բավարարող ավելի անվտանգ այլընտրանքների:
«Ծխելու վերաբերյալ «Փոխեք, որ թողնեք» ծրագիրը փորձում է բավականին նախաձեռնող և նորարարական մոտեցում», – ասել է նա: «Կան համոզիչ ապացույցներ այդ ծրագրի փորձնական տարբերակից, որը մենք արել ենք ավելի փոքր մասշտաբով․ եթե մենք կարողանանք օգնել չափահաս ծխողներին՝ ծխելուց հրաժարվել և անցնել էլեկտրոնային սիգարետների, դա ակնհայտորեն կբարելավի հանրային առողջությունը և մեծ օգուտներ կբերի»։
Վարչապետը այս ծրագիրը կապել է հանրային առողջության ավելի լայն մոտեցման հետ: Նա մատնանշել է սննդի վրայի կալորիականության մակնշումը, որը մարդկանց տալիս է անհրաժեշտ ինֆորմացիա՝ տեղեկացված ընտրություն կատարելու համար: Ինքը՝ վարչապետը, չի ծխում և չի խմում, բայց խոստովանում է, որ կախվածություն ունի գազավորված ըմպելիքներից։
Նա օգտագործում է եղեգնաշաքարի պարունակությամբ ըմպելիքներ, որը ավելի լավ է, քան ֆրուկտոզայի վրա հիմնված սովորական հյութը, բայց դա չի բավարարում առողջապահության համաշխարհային կազմակերպության խիստ և անհասանելի չափանիշներին: Ըստ վարչապետի՝ պետք է պրագմատիկ մտածել ոչ վարակիչ հիվանդությունների դեմ պայքարի մոտեցման մեջ։
Առողջապահության համաշխարհային կազմակերպությունը հորդորում է ավելի քիչ շաքար օգտագործել՝ առանց շաքարի փոխարինողներին անցնելու, որը հակասում է բրիտանական առողջապահության ծառայության խորհրդին, քանի որ շուկայում առկա բոլոր քաղցրացուցիչները ենթարկվում են «անվտանգության խիստ գնահատման»: Բրիտանական կառույցի հետ համակարծիք են նաև Միացյալ Նահանգների սննդամթերքի և դեղերի գործակալությունը և Գերմանիայի ռիսկերի գնահատման դաշնային ինստիտուտը:
ԱՀԿ-ն նաև ակտիվորեն հետապնդում է սիգարետի անծուխ այլընտրանքների նկատմամբ արգելող մոտեցում, թեև, ըստ բազմաթիվ երկրների առողջապահական մարմինների, դրանք կարող են կարևոր դեր խաղալ որպես ավելի լավ այլընտրանք նրանց համար, ովքեր չեն թողնում ծխելը։
Հնարավոր է, որ մարդիկ իսկապես առողջ կյանքով ապրեին առանց շաքար պարունակող մթերքների՝ ալկոհոլի և ծխախոտի, բայց իրական աշխարհում դա այդպես չէ, և կարևոր է մարդկանց խրախուսել գոնե ավելի առողջ կյանք վարել: Առանց ավելի քիչ վնասակար այլընտրանքների՝ միլիարդավոր մարդիկ կշարունակեն խմել, ծխել և ուտել շաքար, աղ և այլ անառողջ սնունդ:
Վերջին տասնամյակի ընթացքում բազմաթիվ հանրային առողջապահական հաստատություններ և փորձագետներ սկսել են աջակցել անծուխ այլընտրանքները՝ որպես սովորական սիգարետ ծխողների համար ավելի լավ տարբերակ։
2015թ. ԱՀԿ-ի ծխախոտի արտադրանքի կարգավորման ուսումնասիրության խումբը նույնիսկ նշել է, որ «պակաս թունավոր կամ ավելի քիչ կախվածություն առաջացնող» արտադրանքը «կարող է լինել ծխախոտի հետ կապված մահերի և հիվանդությունների նվազեցման համապարփակ մոտեցման բաղադրիչ»: Ապացույցները զգալիորեն աճել են, որ այն նիկոտինային արտադրանքները, որոնք չեն այրվում, ավելի լավ այլընտրանք են ծխելուն:
Պատահական չէ, որ Եվրոպայում ծխելու ամենացածր մակարդակը Շվեդիայում է՝ 5%: Սա այն միակ երկիրն է ԵՄ-ում, որտեղ կա ծխելու՝ վաղուց հաստատված և տարածված այլընտրանք՝ սնուսը: Քաղցկեղի դեպքերը, ներառյալ՝ բերանի խոռոչի քաղցկեղը, կտրուկ նվազել են, քանի որ շվեդները թողել են ծխելը, իսկ նրանք, ովքեր չեն կարող հրաժարվել նիկոտինից, հաճախ անցնում են սնուսի:
Իդեալական աշխարհում ծխելը վերացնելու լավագույն միջոցը կլինի այն, որ մարդիկ երբեք չսկսեն ծխել: Բայց լավագույնը չպետք է լինի լավի թշնամին, իսկ էլեկտրոնային սիգարետները, սնուսը և առանց այրման աշխատող մյուս այլընտրանքները ծխելը թողնելու արդյունավետ միջոց են, հաճախ՝ միակ ճանապարհը: