Թուրքական Anadolu գործակալության փոխանցմամբ՝ Թուրքիայի վարչապետ Էրդողանը «Ալ-Ջազիրա» հեռուստաալիքին տված հարցազրույցի ժամանակ խոստորեն քննադատել է Սիրիայի նախագահ Բաշար Ալ-Ասադին՝ սեփական ժողովրդին ահաբեկիչ անվանելու համար.
«Մեզ մոտ եթե ահաբեկիչների ձեռքին զենք կա, մենք նրանց սպանում ենք։ Միչդեռ երբ պարոն Ասադը ծովից ռմբակոծության է ենթարկում Լազքիե քաղաքը, անհասկանալի է, թե նա ինչ նպատակ է հետապնդում դրանով։
Քաղաքական առաջնորդները պետք է իրենց ապագան կառուցեն արդարության և ոչ թե զուլումի սկզբունքի հիման վրա։ Արյամբ իշխանություն չեն պահում, արյամբ իշխանություն պահողներն արյամբ էլ հեռանում են»։
Հիշեցնենք, որ քուվեյթական «Ալ Սիյասի» թերթը, վկայակոչելով Բրյուսելում ՆԱՏՕ-ի դիվանագետներից մեկին, գրել էր, որ վերջին շրջանում Իսրայելի հասցեին թուրքական կողմի ռազմաշունչ հայտարարությունները պայմանավորված են թուրք-սիրիական հարաբերություններով.
«Անկարան մտադիր է լիովին խզել իր հարաբերությունները Սիրիայի հետ։ Հենց դրանով է բացատրվում Թուրքիայի վարչապետ Էրդողանի հակաիսրայելական ելույթների դրամատիզմը։ Էրդողանը չի ցանկանում, որ Դամասկոսի հետ հարաբերությունների խզումը մուսուլմանական աշխարհի աչքում դիտվի որպես իսրայելական ճնշման արդյունք»։
