Այսօր աշխարհի վրա ամեն տեղ ինքնության ճգնաժամ կա՝ սկսած Եվրոպայի հզորագույն աստղերից: Այս մասին «Առաջին լրատվական»-ի հետ զրույցում նշեց Ստամբուլի և Թուրքիայի Կաթողիկե Հայոց Առաջնորդ, Արքեպիսկոպոս, հայագետ Լևոն Զեքիյանը:
«Որովհետև աշխարհը արմատական ու հիմնարար հեղաշրջումների է ենթարկվել, և այդ գործընթացն այնքան արագ է ընթացել, որ մարդիկ առհասարակ պատրաստ չէին դիմագրավելու այս մարտահրավերը: Ես շւտով 80 տարեկանը կբոլորեմ և ներկա աշխարհը, ներկա իրադրությունը կապ չունի այն իրադրության հետ, որը կար իմ 20 կամ 30 տարեկան եղած ժամանակ: Ըստ իս, նաև մեր հայ ժողովրդի համար ինքնության մեծ մարտահրավեր կա, որի արմատները գնում են մինչև 19-րդ դար: 19-րդ դարում բոլոր ժողովուրդները ազդեցություն ստացան ֆրանսիական հեղափոխությունից, բայց ամեն ժողովուրդ ջանաց այդ գաղափարները իրագործել կամ գործադրել իր հասարակության մեջ այն ձևով, ինչպես Ֆրանսիայում գործադրվեց: Սակայն դրանք միշտ չէ, որ հարիր էին այդ ժողովրդի բնույթին: Օրինակ, Իտալիան միացյալ թագավորություն կազմեց, բայց Իտալիան կարող էր նվազագույնը 10 թագավորություն կազմել: Այստեղ հարցն այն է, թե ինչ չափով ուրիշ աղբյուրից բխող ջուրը կարող է սննունդ տալ տարբեր մարդկանց»,-ասաց նա:
