Ճգնաժամային կառավարման ազգային կենտրոն hունիսի 13-ին ժամը 06։31-ին ահազանգ է ստացվել, որ Երևանի Աշտարակի խճուղում՝ Նորաշեն թաղամասի մոտակայքում, տեղի է ունեցել ՃՏՊ, կան տուժածներ:
Ինչպես տեղեկանում է Փրկարար ծառայության տարածած հաղորդագրությունից, պարզվել է, որ «Mercedes-Benz Sprinter» մակնիշի ավտոմեքենան դուրս է եկել ճանապարհի երթևեկելի հատվածից և բախվել կայանած «ZIL» մակնիշի բեռնատարին (վարորդ՝ Ռ. Ի.): «Mercedes-Benz Sprinter» մակնիշի ավտոմեքենայից առկա է վառելիքաքսուկային նյութերի արտահոսք։
Փրկարարները հոսանքազրկել են «Mercedes-Benz Sprinter» մակնիշի ավտոմեքենան, դուրս բերել երեք արգելափակված քաղաքացու, տուժածներ Է. Ա.-ին (ծնված 1994 թ.), Թ. Տ.-ին (ծնված 1969 թ.), Լ. Խ.-ին (ծնված 2005 թ.), Մ. Բ.-ին (ծնված 1994 թ.), Դ. Կ.-ին (ծնված 1997 թ.), Է. Հ.-ին (ծնված 1992 թ.) և Ա. Մ.-ին (ծնված 1992 թ.) մոտեցրել շտապօգնության մեքենային և սահմանազատել տարածքը։
a5.jpg (633 KB)
Առողջապահության նախարարության տարածած հաղորդագրության համաձայն՝ Արմենիա բժշկական կենտրոն տեղափոխված 7 պացիենտներից 3-ն օտարազգի են: Նրանք ամբուլատոր բուժում են ստացել և դուրս գրվել:
Տուժածներից 4-ը հոսպիտալացվել է, 1-ը գտնվում է վերակենդանացման բաժանմունքում, 2-ը` նյարդավիրաբուժական, 1 հոգի` տրավմատոլոգիայի բաժանմունքում:
Բոլորի առողջական վիճակը գնահատվում է միջին ծանրության:
