Հայաստանում ատոմային նոր էներգաբլոկի կառուցման աշխատանքները նախատեսում են սկսել 2025 թվականի սկզբին։ Այդ նպատակով վարչապետ Նիկոլ Փաշինյանի որոշմամբ ստեղծվել է միջգերատեսչական աշխատանքային խումբ, որը նոր միջուկային էներգաբլոկ կառուցելու, փոքր մոդուլյար ռեակտորներ տեղակայելու նպատակահարմարության, ինչպես նաև անհրաժեշտ տեխնոլոգիաների ընտրության նպատակով վերլուծություններ կիրականացնի և երկամսյա ժամկետում Հայաստանի Հանրապետության վարչապետի աշխատակազմ կներկայացնի հաշվետվություն՝ աշխատանքային խմբի կատարած աշխատանքների վերաբերյալ։
Նախորդ տարի Հայաստանի և Ռուսաստանի միջև ստորագրվեց միջպետական համաձայնագիր, որով նախատեսվում է 1000-1200 մեգավատ հզորությամբ էներգաբլոկ կառուցել։
Ըստ համաձայնագրի՝ մեկ տարվա ընթացքում պետք է մշակել ճանապարհային քարտեզ, պետք է վերջանական որոշում կայացնել՝ ռեակտորի տիպի և այլ տեխնիկական պարամետրերի հետ կապված։
Իշխանությունը նշում է՝ դեռ պարզ չէ՝ ինչ հզորությամբ ատոմակայան պետք է կառուցել։ ՀՀ տարածքային կառավարման և ենթակառուցվածքների նախարար Գնել Սանոսյանը օրերս խորհրդարանում անդրադարձավ նոր ատոմակայան ունենալու անհրաժեշտությանը, նշեց, որ մոտ երկու տարի դեռ պետք է նախապատրաստվել, բայց նախ պետք է հասկանանք՝ ինչ հզորության էներգաբլոկ ենք ընտրում:
