ՀՀ վարչապետ Նիկոլ Փաշինյանը մայիսի 4-5-ին Չեխիայի Հանրապետություն կատարած պաշտոնական այցի շրջանակում հարցազրույց է տվել CNN primanews հեռուստաընկերությանը: Պատասխանելով հարցին, թե ինչպիսի՞ն է Հայաստանի դիրքորոշումն ուկրաինական պատերազմի վերաբերյալ, ՀՀ վարչապետը պատասխանել է․ «Դուք ասացիք, որ մենք Ռուսաստանի դաշնակիցն ենք: Իհարկե, սրա մասին երբեք բարձրաձայն չի ասվել, բայց կարծում եմ՝ դա տեսանելի է. Ուկրաինայի հետ պատերազմում մենք Ռուսաստանի դաշնակիցը չենք: Եվ մեր զգացումն այդ պատերազմից, այդ հակամարտությունից՝ անհանգստություն է, որովհետև դա ուղիղ ազդում է մեր բոլոր հարաբերությունների վրա: Արևմուտքում նկատում են, որ մենք Ռուսաստանի դաշնակիցն ենք, ավելի շատ դա են նկատում, Ռուսաստանում տեսնում են, որ մենք Ուկրաինայի պատերազմում իրենց դաշնակիցը չենք, և ստացվում է, որ մենք այս իրավիճակում ոչ մեկի դաշնակիցը չենք, ինչը նշանակում է, որ խոցելի ենք»: Թեմայի շուրջ «Առաջին լրատվական»-ը զրուցել է ուկրաինահայ քաղաքական վերլուծաբան Մարատ Հակոբյանի հետ:
Վերլուծաբանի խոսքով՝ Նիկոլ Փաշինյանի հայտարարությունը երկար սպասված էր, բայց մի փոքր ուշացած․ «ՌԴ-ն ցեղասպան պատերազմ է վարում․ Փաշինյանը մի փոքր ուշացած, բայց արդար դիրքորոշում հայտնեց»:
