Վերջին տարիներին երեխաների սոցիալական վիճակը վատացել է, աղքատությունը խորացել է, և ունենք նաև Արցախից երեխաներ. շատ մտահոգիչ է երեխաների սոցիալական վիճակը, որը գալիս-կապվում է իրենց առողջական վիճակի, կրթության հետ: Այս մասին «Առաջին լրատվական»-ի հետ զրույցում նշել է «Օրրան» ՀԿ-ի հիմնադիր Արմինե Հովհաննիսյանը:
«Բայց երեխաներն ամենուր ուրախ են, նույնիսկ բոբիկ ոտքերով լինեն, նույնիսկ եթե ստամոքսում լավ ուտելիք չկա, նրանք ուրախ են, ժպտերես են, իրենք կյանքը ավելի գունեղ են դարձնում: Այդ պատասխանատվությունը մենք՝ մեծերս ենք զգում, թե ինչ ենք անում, որ մեր երեխաների կյանքը բարելավենք, ինչ ապագա ենք իրենց համար կերտում: Այդ առումով վերջին երկու տարին, պատերազմից հետո, հասկանալի կերպով շատ մտահոգիչ է: Ընդհանրապես, այն ամենօրյա ցանկությունները, որ երեխաներին ասում էին՝ պայծառ ապագա, անհոգ մանկություն, կարծես այդ ամենը դառնում են երկրորդական, երբ մեր երկրի և երեխաների կյանքի անվտանգությունն է արդեն մտահոգիչ»,-ասաց նա:
