Թուրքական Cumhuriyet թերթի փոխանցմամբ՝ թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն Իզմիրում տեղի ունեցած կուսակցական ժողովում պատասխանել է Թուրքիայի վարչապետ Էրդողանի ու արտգործնախարար Դավութօղլուի այն հայտարարություններին, որում նրանք իրեն նմանեցրել են Իսրայելի փաստաբանի և իսրայելցի պաշտոնյայի.
«Ես միայն իմ ժողովրդի փաստաբանն եմ և ոչ ավելին։ Ո՞վ է Իսրայելի փաստաբանը։ Մի՞թե ես եմ մատուցած ծառայությունների համար շքանշան ստացել ԱՄՆ հրեական լոբբիից, թե՞ Էրդողանը։
Թուրքիայի արտաքին քաղաքականությունը կորցրել է ինքնահարգանքը։ Թուրքիայի արտաքին քաղաքականությունն անջատվել է իր հիմնական նպատակներից։ Այն հարմարեցվել է Էրդողանի ոճին։ ԱԶԿ-ի իշխանության 9 տարիներին Թուրքիան բավական շատ բան է կորցրել։
Ե՛վ Իսրայելի հետ հարաբերությունները փչացրեցին, և՛ ցանկանում են Թուրքիա բերել ամերիկյան հակահրթիռային պաշտպանության (ՀՀՊ) համակարգը։ Այդ դեպքում ո՞վ է ամերիկյան ՀՀՊ-ի փաստաբանը։ Ինչի՞ համար են ամերիկյան ՀՀՊ համակարգը բերում Թուրքիա։ Բնականաբար, ոչ Թուրքիան պաշտպանելու համար։ Այն ուղղվելու է Իրանի դեմ և պաշտպանելու է Իսրայելը։ Այդ դեպքում ո՞վ է Իսրայելի փաստաբանը։
Ես չեմ Մեծ Մերձավոր Արևելքի նախագծի (ըստ որի՝ պետք է ստեղծվի Դիարբեքիր մայրաքաղաքով անկախ քրդական պետություն, որին անցնելու են Թուրքիայի արևելյան 13 նահանգները.- 1in.am) համահեղինակը։ Ես չեմ պաշտպանել դա, ես չեմ ողջունել Իրաքում հազարավոր մուսուլման կանանց բռնաբարող ամերիկյան զինվորներին։
Թուրքիան արագորեն հեռանում է Եվրոպայից։ Եթե Էրդողանի գլխավորած «Արդարություն և զարգացում» կուսակցության (ԱԶԿ) արտաքին քաղաքականությունն այսպես շարունակվի, ապա Թուրքիան ԵՄ-ին կանդամակցի միայն 100 տարի անց։
«Քրդական» նախաձեռնություններից (բարեփոխումներ) խոսող Էրդողանի բերանից արյուն է թափում (նկատի է առնվում քրդերի նկատմամբ վարած կոշտ քաղաքականությունը.- 1in.am)։ Վարչապետը խոսում էր «հայկական» նախաձեռնությունից, սակայն այսօր թե՛ ավելի ենք հեռացել Հայաստանից, թե՛ կորցրել ենք բարեկամ ու եղբայր Ադրբեջանը։ Թյուրքական աշխարհում նույնպես կորուստներ են գրանցվել։
Տարիներ ի վեր խոսվում էր Nabucco գազատարի նախագծի իրագործման մասին, մինչդեռ այսօր Nabucco-ից անգամ N-ն էլ չի արվել, 9 տարում 9 սանտիմետր խողովակաշար չի կառուցվել։ Թուրքիան Սիրիայի հետ մաքսային միության մեջ մտավ, սակայն դրանից 3 ամիս անց հայտնվել էր այդ երկրի հետ պատերազմի նախաշեմին։ Լիբիայի հարցում նրանք հայտարարեցին, որ «դեմ» են արտաքին զինված միջամտությանը, ի՞նչ գործ ունի ՆԱՏՕ-ն այնտեղ։ Ընդամենը մեկ շաբաթ անց պարզվեց նրանց այդ սուտը։
Մեր երկիրը վերածվել է արյան ծովի, իսկ կառավարությունը նմանվել է կաղ բադի»։
