Հայաստանի և Ադրբեջանի միջև բանակցությունները շարունակում են առաջնահերթություն մնալ Միացյալ Նահանգների համար, հայտարարել է ԱՄՆ պետքարտուղարության խոսնակ Մեթյու Միլլերը` անդրադառնալով նախօրեին Մոսկվայում Հայաստանի, Ռուսաստանի և Ադրբեջանի ղեկավարների եռակողմ հանդիպմանը։
«Ինչպես գիտեք, պետքարտուղարը մի քանի շաբաթ առաջ կողմերին հյուրընկալեց այստեղ՝ Վաշինգտոնում։ Դրանից հետո բանակցությունները շարունակվել են Բրյուսելում, և մենք աջակցում ենք բանակցությունների շարունակությանը։ Մենք հավատում ենք, որ համաձայնությունը մոտ է, և մենք շարունակում ենք ճնշում գործադրել երկու կողմերի վրա, որպեսզի նրանք համաձայնության հասնեն այն հարցերի շուրջ, որոնք մնում են չլուծված»,- ճեպազրույցի ժամանակ ասել է Միլլերը։
Նա նշել է, որ պետքարտուղար Էնթոնի Բլինքենի նախաձեռնությամբ նոր հանդիպումներ անցկացնել մասին տեղեկություններ չունի, սակայն վստահեցրել է, որ ԱՄՆ-ն կշարունակի ներգրավված մնալ այդ հարցում:
Քաղաքագետ Գարիկ Քեռյանի խոսքերով՝ արևմուտքն ու Ռուսաստանը լուրջ մրցակցություն ունեն հայ-ադրբեջանական կարգավորման մոդերատորության հարցում ու Միլլերի նշած «ճնշումների գործադրումը» պետք է դիտարկել հենց այդ համատեքստում.«Իհարկե արևմուտքում կա անհանգստություն, որ Պուտինը կարող է ավելի շուտ գտնել փոխզիջումային տարբերակ և պայմանագրի կնքումը տեղի ունենա իր քավորությամբ։ Երբ տեսնում են, որ Մոսկվայում հանդիպում է եղել, արևմուտքը բնականաբար ավելի է ակտիվանում, փորձում պայմանագրի կնքումը տեղափոխել Բրյուսել։ Հնարավոր է, որ նույն փաստաթուղթը ստորագրվի Մոսկվայում, մի փոքր այլ բովանդակությամբ՝ Բրյուսելում կամ Վաշինգտոնում, բայց որ մայրաքաղաքում որ ստորագրվեց՝ դա որոշակի քաղաքական ազդեցության լծակներ կհաղորդի միջնորդ կողմին»,-«Առաջին լրատվական»-ի հետ զրույցում ասաց նա։
Քեռյանի խոսքերով՝ բանակցություններում արձանագրված միակ առաջընթացն այն է, որ կողմերը արձանագրել են, թե քանի կիլոմետր տարածքներով են ճանաչում միմյանց տարածքային ամբողջականությունները.«Առայժմ միակ ձեռքբերումը սա է։ Շատ հնարավոր է, որ ստորագրությունից ժամեր առաջ իրավիճակ փոխվի ու գործընթացը տապալվի»։
Քաղաքագետը հիշեցնում է, որ Քի Ուեսթյան համաձայնագրի տապալումը պայմանավորված էր ընդամենը կես ժամ առաջ Հեյդար Ալիևի դիրքորոշման փոփոխությամբ.«Ամեն ինչ արդեն պատրաստ էր։ Մինսկի խմբի համանախագահների, Ադրբեջանի ու Հայաստանի նախագահների միջև համաձայնությունը կար, բայլ Ալիևը տապալեց։ Հիմա էլ ասել, որ ամեն ինչ հարթ ձևով կընթանա՝ բարդ է։ Այն ժամանակ ավելի շատ էր վստահությունը, որ կստորագրվի, քան հիմա, բայց ինչպես տեսանք՝ տապալվեց։ Հիմա էլ չունենք ոչ մի երաշխիք, որ վերջին պահին կստորագրվի։ Անակնկալներ միշտ հնարավոր են»։
Միևնույն ժամանակ մեր զրուցակիցն արձանագրում է, որ հարցն այժմ վերաբերում է ոչ միայն Հայաստանին ու Ադրբեջանին, այլ նաև կախված է Իրանի, Թուրքիայի ու Ռուսաստանի դիրքորոշումներից.«Պետք է ասել, որ միշտ չէ, որ նույն կարծիքն ունեն նաև ԱՄՆ-ն ու ԵՄ-ն։ Մինչև չստորագրվի՝ չենք կարող ասել, թե ինչ երաշխիքներ կունենա խաղաղության գործընթացը։ Հիշենք, նույնիսկ հայ-թուրքական արձանագրությունները, որոնց վերաբերյալ կային լավատեսական կանխատեսումներ, ստորագրվեցին, բայց արդյունքում որևէ բան տեղի չունեցավ, խորհրդարաններն էլ չվավերացրեցին»,-եզրափակեց նա։
