ՆԱՏՕ-ի գլխավոր քարտուղարի Կովկասում և Կենտրոնական Ասիայում հատուկ ներկայացուցիչ Խավիեր Կոլոմինան այցելում ՝ տարածաշրջան՝ Վրաստան, Հայաստան ու Ադրբեջան։ Կոլոմինան Հայաստանում է, ապա կայցելի նաև Ադրբեջան ու Վրաստան։
ՀՀ արտաքին գործերի նախարար Արարատ Միրզոյանն ընդունել է ՆԱՏՕ-ի պաշտոնյային։ Զրուցակիցներն անդրադարձ են կատարել Հայաստան-ՆԱՏՕ համագործակցության հարցերի։ Քննարկել են Հարավային Կովկասում անվտանգությանը և կայունությանը վերաբերող հարցեր։
Արարատ Միրզոյանը ներկայացրել է Հայաստանի և Ադրբեջանի միջև բանակցային գործընթացում վերջին քննարկումները, հիմնական հարցերի շուրջ հայկական կողմի տեսլականը: Նախարար Միրզոյանը շեշտել է Ադրբեջանի կողմից ագրեսիվ քաղաքականությունից ու սադրիչ գործողություններից հրաժարվելու անհրաժեշտությունը, ինչը կարևոր գործոն է բանակցություններում առաջընթացի ուղղությամբ: Ընդգծվել է տարածաշրջանում կայունությամբ շահագրգռված դերակատարների կողմից գործուն քայլերի կարևորությունը:
Քաղաքագետ Անդրիաս Ղուկասյանի կարծիքով՝ մեր տարածաշրջանի նկատմամբ հետաքրքրությունն աճում է, քանի որ ուշագրավ իրադարձություններ են տեղի ունենում թե՛ Վրաստանում և թե՛ նաև հայ-ադրբեջանական հակամարտության կարգավորման համատեքստում.«Այժմ չկա հստակ պատկեր, թե ինչ ձևաչափ է աշխատում Հայաստանի ու Ադրբեջանի միջև կարգավորման հարցերի հետ կապված։Նիկոլ Փաշինյանն իր վերջին ասուլիսում ոչ ուղղակի, բայց հայտարարեց, որ ԵԱՀԿ Հելսինկյան ավարտական ակտը խախտված է Ռուսաստանի Դաշնության կողմից՝ Ուկրաինայի դեմ ագրեսիայի հետևանքով։ Եվ թե ինչը կարող է լինել դրա փոխարեն՝ կարելի է միայն ենթադրել, որովհետև տեսնում ենք, որ Հայաստանը միաժամանակ մի քանի հարթակներում է բանակցություններ տանում՝ թե՛ Բրյուսելում, թե՛ Վաշինգտոնում և թե՛ Մոսկվայում։ Եթե Վաշիգտոնն ու Բրյուսելը կարող ենք համարել փոխկապակցված հարթակներ, ապա Ռուսաստանի Դաշնությունում սպասվելիք հանդիպումը հասկանալի չէ։ Ինչպե՞ս կարելի է զուգահեռ աշխատանք իրականացնել այդպիսի տարբեր, միմյանց մերժող հարթակներում։ Դրա վերաբերյալ մասնագիտական շրջանակներում հնչել է քննադատություն, բայց անկասկած է, որ միջազգային կառույցների ուշադրությունից դա չի վրիպում»,-«Առաջին լրատվական»-ի հետ զրույցում ասաց նա։
Ղուկասյանի խոսքերով՝ տարածաշրջանային բոլոր այցերը առնչվում են ընթացիկ իրավիճակի հետ ու այդ առումով կարելի է ակնկալել, որ կողմերը հնարավորություն ունենան իրենց դիրքորոշումները հստակեցնել։
Ինչ վերաբերում է Հայաստան-ՆԱՏՕ երկկողմ օրակարգին, ապա մեր զրուցակցի դիտարկմամբ՝ այս փուլում նման օրակարգ առհասարակ չկա.«Հայաստանի Հանրապետությունը փաստացի գտնվում է ՆԱՏՕ-ի թշնամական ճամբարում՝ ՀԱՊԿ-ում։ Դրանք այն պետություններն են, որոնք չեն համարում, որ Ռուսաստանը հարձակումն Ուկրաինայի վրա ագրեսիա է, այսինքն՝ համարում են, որ դա պատճառաբանված էր Ուկրաինայի ու ՆԱՏՕ-ի գործողություններով։ Այս կոնտեքստում մտածել, որ Հայաստանն ու ՆԱՏՕ-ն կարող են ընդհանուր օրակարգ ունենալ՝ շատ դժվար է»։
Միևնույն ժամանակ Ղուկասյանը համարում է, որ ՆԱՏՕ-ն բնականաբար կարող է ակնկալել դիրքորոշումների հստակեցում Հայաստանի, Ադրբեջանի ու Վրաստանի ղեկավարներից՝ այն առումով, թե ինչպես են այդ պետությունները հետագա զարգացումների տեսակետից իրենց ռազմավարությունը տեսնում.«Այսինքն՝ որքան խորանա ճգնաժամը Ուկրաինայում, տարածաշրջանային երկրների ղեկավարները պետք է հստակ դիրքորոշում հայտնեն։ Վրաստանը ճանաչել է ՌԴ-ն ագրեսոր, ՆԱՏՕ-ի համար գործընկեր պետություն է, իսկ Հայաստանն ու Ադրբեջանը այդ առումով հնարավորինս օժանդակություն են ցուցաբերում Ռուսաստանին՝ նաև պատժամիջոցների շրջանցման հարցում։ Այդ ամենը, բնականաբար, ՆԱՏՕ-ի համար անընդունելի է, վաղ թե ուշ այդ հարցերը պետք է հասունանան ու դրվեն սեղանին»,-եզրափակեց նա։
