2022-ին արտահանումն աճել է 79 տոկոս՝ երեք միլիարդից հասնելով 5․3 միլիարդի։ Ընդ որում, Հայաստանից դեպի ԵԱՏՄ երկրներ արտահանման ծավալն աճել է 2,8 անգամ։
5,3 միլիարդի մեջ մոտ մեկ միլիարդը եղել է մեքենաների և տեխնիկայի վերարտահանումը դեպի ՌԴ և մոտավորապես 400 միլիոնը թանկարժեք քարերի և մետաղների վերարտահանումը, այսինքն՝ մոտավորապես կես միլիոնը։
tvyal.com կազմակերպության ղեկավար, Ամբերդ հետազոտական կենտրոնի փորձագետ Աղասի Թավադյանը «Առաջին լրատվական»-ի հետ զրույցում նշեց, որ 2022-ին Ռուսաստանից Հայաստան է ներմուծվել 177 միլիոն դոլարի ադամանդ և արտահանվել է 193 միլիոն դոլարի ադամանդ: «Ինչպես նաև 209 միլիոն դոլարի չմշակված ոսկի է վերարտահանվել ԱՄԷ: 7-8%-ը դա Ռուսաստանից բերված ոսկին ու ադամանդն է, որը վերաարտահանվել է ԱՄԷ: Այսինքն՝ 2022-ի ընթացքում թանկարժեք քարերի և մետաղների ներմուծումը Ռուսաստանից և արտահանումը ԱՄԷ համազոր են։ Այստեղ հետաքրքիր է չմշակված ոսկու արտահանման պատկերը։ Արտահանումը սկսվել է անցյալ տարվա մայիսին և սկզբում վերարտահանվել է Թուրքիա: Ընդհանուր առմամբ Թուրքիա վերարտահանվել է 70 միլիոն դոլարի չմշակված ոսկի, որը մեր արտահանման մոտ մեկուկես տոկոսն է, այսինքն՝ բավականին զգալի հատվածը։
Եթե հիշում եք, նախորդ տարի նշում էին, որ երեք ամսում Թուրքիա ենք արտահանել 57 մլն դոլարի ոսկու փոշի։ Ոսկու շարժը երեւաց, աղմուկից հետո վերարտահանվեց ԱՄԷ»,-ընդգծեց Թավադյանը:
Նա ընդգծեց, որ այս պահին ամենաշատ պատժամիջոցներ կիրառվում են Ռուսաստանի նկատմամբ՝ մոտ 40 000, երկրորդ տեղում Պարսկաստանն է, մոտ 17․000 պատժամիջոց տարբեր պետություններից. «Դրա արդյունքում Ռուսաստանից մեծ քանակությամբ աշխատուժ եւ կապիտալ արտահոսեց, կապիտալի մոտ 17 տոկոսը հայտնվեց ԵՄ պետություններում, 16 տոկոսը ԱՄԷ-ում, իսկ 12,5 տոկոսը հայտնվեց Հայաստանում։ Կապիտալի արտահոսքի մեծ մասն արվեց արտարժույթով, իսկ մի մասն էլ՝ ոսկով: Մենք հիմա այդ արտահոսքի հետքերն են տեսնում, որն էլ մեծացրեց մեր արտահանումը:
Փաստացի, նախնական հաշվարկով 5,3 միլիարդ վերարատահանման մեկ միլիարդը մեքենաների և սարքավորումների, տեխնիկայի վերարտահանումն է Ռուսաստան և կես միլիոնը Ռուսաստանից դեպի այլ երկրներ, հիմնականում ԱՄէ թանկարժեք քարերի և մետաղների վերարտահանումն է Ռուսաստանից Հայաստանի միջոցով։ Եթե այդ երկու հոսքը հանենք, ապա մեր արտահանման ցուցանիշը կազմել է 3,8 միլիարդ դոլար, որը մոտ 25 տոկոս աճ է կազմում»,-նկատեց տնտեսագետը:
