– Վերջին օրերին գրեթե բոլոր երկրների վերաբերյալ WikiLeaks-ը հրապարակումներ է տարածել, այդ ամենին անմասն չեն նաև Վրաստանն ու Հայաստանը: Հայաստանում այդ հրապարակումները գրավել են հանրության մեծ ուշադրությունը: Պարոն Զաքարեաշվիլի, ինչպիսի՞ն է տրամադրությունը Վրաստանում` կապված WikiLeaks-յան հրապարակումների հետ:
– Տարբեր հրապարակումներ տարբեր արձագանք են գտնում` կախված այն հանգամանքից, թե ինչ հարցի շուրջ են թեմաներ հրապարակվում: Սակայն, ընդհանուր առմամբ, ուշադրությունն իհարկե մեծ է, և կա որոշակի արձագանք: Վրաստանում մեծամասնությունը հավատում է WikiLeaks-յան հրապարակումներին և հիմնական կարծիքն այն է, որ այդ հրապարակումները արտացոլում են իրականությունը:
– Իսկ Վրաստանի քաղաքական դաշտի վրա այդ հրապարակումները ազդեցություն թողնո՞ւմ են:
– Նման միտումներ դեռևս չեն նկատվում, արձագանքները դեռ չենք տեսնում: Հիմնական արձագանքն այն է, որ փորձագետները գնահատում են այդ հրապարակումները, բացահայտումները և բավարարվում դրանով: Առայժմ ինչ-որ առանձնահատուկ փոփոխություններ կամ հուզումներ չեն նկատվում:
– Վրաստանին վերաբերող WikiLeaks-յան հրապարակումներից մեկում խոսվում էր վրաց Ուղղափառ եկեղեցու և իշխանությունների, քաղաքացիական հասարակության ու ընդդիմության փոխհարաբերությունների մասին՝ փաստելով, որ վրաց Պատրիարքը քաղաքականության մեջ մեծ դեր ունի:
– Այո՛, նման հրապարակում եղել է, սակայն դա Վրաստանի հասարակությանն այնքան էլ չի հուզում, ես չեմ նկատել, որ ինչ-որ մեկը դա քննարկեր: Քաղաքական գործիչների վերաբերյալ տեղեկատվություններն ավելի բուռն են քննարկվում, քան Պատրիարքին առնչվող նյութերը:
– Պարոն Զաքարեաշվիլի, Վրաստանին վերաբերող WikiLeaks-ի մի քանի հրապարակումներ առնչվում էին նաև Հայաստանին: Մասնավորապես նշվում էր, թե Նինո Բուրջանաձեին և նրա ամուսնուն՝ Ռուսաստանում ապրող վրացի «օրենքով գողերը» գումարներ փոխանցել են Հայաստանի միջոցով, կամ՝ հայ-վրացական սահմանի փակման վերաբերյալ Հայաստանում Վրաստանի դեսպանի դիտարկումները: Այդ հրապարակումներն ինչպե՞ս են ընկալվում Վրաստանում և արդյո՞ք դրանք չեն կարող հայ-վրացական հարաբերությունների վրա որոշակի ազդեցություն ունենալ:
– Հիմնականում վրացի փորձագետների, քաղաքական շրջանակների կողմից հայկական թեմաներով հրապարակումները չեն քննարկվում: Վրաստանում առավել մեծ ուշադրության է արժանանում մասնավորապես այն հարցը, թե ԱՄՆ դիվանագիտական շրջանակները ինչպես են գնահատել վրացի տարբեր քաղաքական գործիչների հնարավորությունները` Բուրջանաձեի, Գաչեչիլաձեի, Ալասանիայի, ում են առաջնություն տվել: Ինչ վերաբերում է Հայաստանի միջոցով Ռուսաստանից Բուրջանաձեին գումարներ հասցնելու մասին հրապարակմանը, ապա դա, իհարկե, քննարկվում է, սակայն բոլորը քննարկում են ոչ թե Հայաստանի միջնորդ լինելու հանգամանքը, այլ ռուսական փողերի առկայությունը: Այնպես որ, չեմ կարծում, որ այս հրապարակումները ինչ-որ բացասական ազդեցություն թողնեն հայ-վրացական հարաբերությունների վրա, սա այն հարցը չէ, որ ազդեցությունը մեծ լինի:
– Իսկ ինչ-որ նոր և հետաքրքրաշարժ տեղեկություններ Վրաստանի հասարակությանը տվե՞ց WikiLeaks-ը:
– Չեմ կարծում, որ WikiLeaks-յան հրապարակումները մի այնպիսի ցնցող տեղեկություններ հաղորդեցին, որոնք մենք չգիտեինք: Այդ ամենը Վրաստանում բոլորն էլ գիտեին, պարզապես այդ հրապարակումները ևս մեկ անգամ ապացուցեցին մեր կարծիքները և հաստատվեցին ենթադրությունները: Ավելին՝ Վրաստանում համոզվեցին, որ ամերիկացիները ևս մտածում էին այնպես, ինչպես Վրաստանի փորձագետների հիմնական մասը: Դեռևս չի եղել մի արտառոց հրապարակում, որը մեզ զարմացներ:
– Պարոն Զաքարեաշվիլի, այդ դեպքում, ըստ Ձեզ, ո՞րն է WikiLeaks-յան հրապարակումների նպատակը:
– Նրանք պարզապես հրապարակում են ամերիկյան դիվանագետների գաղտնի նամակները և հաղորդագրությունները, սակայն հակառակ պատասխանները, այսինքն՝ ԱՄՆ իշխանության դիրքորոշումն ու պատասխանները չկան և չեն հրապարակվում, ինչն, իհարկե, ավելի հետաքրքիր կլիներ: Թե ո՞րն է նրանց նպատակը՝ դժվար է ասել, կարծում եմ՝ նրանք հրապարակում են այն ամենը, ինչ հայտնվում է իրենց ձեռքին: