Դեռ նախորդ տարի դատարանն ապացուցել էր, որ Վանաձորի նախկին քաղաքապետ Սամվել Դարբինյանն իր պաշտոնավարման տարիներին ծառայության շահերին հակառակ գործելու, կեղծիքներ կատարելու և համայնքային գույքն իր բարեկամների անունով ապօրինի օտարելու հետևանքով համայնքին պատճառել է շուրջ 61 մլն դրամի վնաս:
Սակայն այժմ պարզվում է, որ Վանաձորի Դեմիրճյան փողոցն ավելի քան երկու միլիոն դոլարով կհիմնանորոգի հենց Դարբինյանի ընտանիքին պատկանող ընկերությունը։
Այս առնչությամբ Լոռու մարզպետ Արամ Խաչատրյանը «Առաջին լրատվական»-ի հետ զրույցում նշեց. «Մրցույթ է տեղի ունենում, գրանցված ընկերություն է, մասնակցել է մրցույթին և որևէ արգելք մենք չենք կարող հարուցել, ասել՝ մի մասնակցիր մրցույթին: Բոլոր գրանցված ընկերություններն էլ իրավունք ունեն մասնակցել, անկախ նրանից՝ ում է պատկանում տվյալ ընկերությունը: Մեր խնդիրն այն է, որ ըստ ժամկետների աշխատանքները իրականացվեն, բնականաբար, որակն ապահովելով»:
Հարցին, թե որակն իսկապես ապահովվո՞ւմ է, քանի որ տեղեկություններ կան, որ այդ ընկերությունը նախկինում էլ ժամկետների խախտումներ է թույլ տվել, անբարեխիղճ ընկերությունների ցանկում է ընդգրկվել, մարզպետը պատասխանեց. «Դրա համար կա տեսչական մարմին: Այս պրոցեսի պատվիրատուն նախարարությունն է, և նախարարությունը, «Ճաննապարհային դեպարտամենտ» հիմնադրամի ղեկավարն էլ է անձամբ 1-2 անգամ եկել, վերահսկել: Ճիշտ է, պատվիրատուն համայնքապետարանը կամ մարզպետարանը չէ, բայց մենք նույնպես գնում ենք, նայում ենք աշխատանքները: Եթե խնդիր ենք տեսնում կամ տեղում բանավոր դիտողություն ենք անում, վերացվում է, կամ գրավոր ներկայացնում ենք նախարարությանը, ասում ենք՝ այսպիսի խնդիրներ կան, և խնդիրները վերանում են: Եթե այդ խնդիրները չվերանան, գումարները չեն փոխանցվի: Մենք խոտանի համար գումար չենք վճարելու: Բայց ես լավն եմ ուզում մտածել, որ մեր ճանապարհները, անկախ նրանից, թե որ ընկերությունն է իրականացնում, պետք է նորմալ լինեն: Ես այսքան ժամանակ լինելով մարզպետ, լուրջ խնդիրներ որևէ ընկերության կողմից չեմ տեսել: Միայն Մոտկորի ճանապարհի հետ կապված է խնդիր եղել, պայմանագիրը չեղարկվել է, նոր մրցույթ է իրականացվել, աշխատանքներն ընթացքի մեջ են: Իսկ կոնկրետ ձեր նշած ընկերության հետ կապված որևէ խախտում այս պահին չեմ հիշում»:
Լոռու մարզպետը բացառեց, որ մրցույթների անցկացման պրոցեսում կարող են կոռուպցիոն ռիսկեր լինել. «Դա էլեկտրոնային համակարգով է արվում, մասնակիցները ներկայացնում են իրենց գինը և ամենացածր գին ներկայացնողն էլ հաղթող է ճանաչվում: Ես բացառում եմ որևէ կոռուպցիոն ռիսկ, որ որևէ մեկը կարողանա նախապես խոստանալ, որ այս կամ այն ընկերությունը կարող է շահել: Նման բան չկա»:
Անդրադառնալով Վանաձորում ստեղծված իրավիճակին, որտեղ երկար ժամանակ բյուջեն չէր հաստատվում, Արամ Խաչատրյանն ասաց, որ այժմ ամեն բան կարգին է. «Բնականոն հունով աշխատանքներն ընթանում են: Մոտ 10 օր առաջ Վանաձորի ավագանու նիստ է եղել, օրակարգում մոտ 30 հարց է եղել, բոլորը հստատվել են, որևէ խնդիր չկա: Ամեն ինչ նորմալ իր հունով առաջ է ընթանում»:
նա նաև տեղեկացրեց, որ այս տարի պետական ծրագրով Վանաձորում 4 ճանապարհ է հիմնանորոգվում. «Մրցույթները արդեն հաստատվել են, իսկ սուբվենցիոն ծրագրերով 3-4 ճանապարհ է նորոգվում: Մաև մանկապարտեզի նորոգում ունենք, գյուղական բնակավայրերում ևս ճանապարհներ ունենք, լուսավորության ծրագրեր: Այս տարի սուբվենցիոն ծրագրերի ընդհանուր արժեքը .5 մլրդ դրամ է»,-ասաց մարզպետը:
Իր հերթին Վանաձորի «Ուղղակի ժողովրդավարություն, Ուղղակի ժողովրդավարություն« ՀԿ ղեկավար Գևորգ Քոթանջյանը «Առաջին լրատվական»-ի հետ զրույցում նշեց, որ մտահոգություն չկա, որ Վանաձորի Դեմիրճյան փողոցը հիմնանորոգվելու է Սամվել Դարբինյանի ընտանիքին պատկանող ընկերությունը, քանի որ հսկողություն իսկապես կա ճանապարհների որակի հետ կապված. «Շատ կարևոր է, որ այդ ճանապարհների հիմնանորոգման մրցույթներում գոնե ինչ-որ մեկը շահի, որովհետև ունեցել ենք փողոցներ, որոնց համար մրցույթներ են հայտարարվել, բայց մասնակից չի եղել: 2-3 անգամ մրցույթ է իրականացվել: Այս դեպքում կարելի է ասել, որ սա քաղաքի համար փրկություն է: Նախ, մրցույթներին շատ քիչ կազմակերպություններ էին դիմում: Եթե նույնիսկ դիմում էին, հիմնականում գալիս ընդհանուր շինարարությունը վերցնում են, հետո սկսում են իրենց տենդերը վաճառել: Այստեղ վերահսկողություն իրականացնելը շատ ավելի բարդ է լինում, քան, օրինակ, նույն Սամվել Դարբինյանին պատկանող ընկերությունը, որ այդ փոքր հատվածը վերցրել է: Իրեն վերահսկելը հնարավոր է, իսկ երբ ամբողջը վերցնում են, հետո սկսում վաճառել ենթակապալառուների, այդ դեպքում շատ ավելի դժվար է լինում վերահսկել գործընթացը»:
Հարցին, թե որքանո՞վ են թափանցիկ անցկացվում մրցույթները, նա պատասխանեց. «Որքանով մրցույթներ հաղթած շինարարական ընկերությունների հետ շփվել ենք, կան նույնիսկ կազմակերպություններ, որոնք զարմացած են, որ իրենց առջև խոչընդտորներ չեն եղել: Համեմատելով Վանաձորում մրցույթները Գյումրիում և Երևանում անցկացվող մրցույթների հետ, որտեղ իրենք ընդհանրապես, հավակնություն չեն կարող ունենալ, նրանք պնդում են, որ եկել են Վանաձոր ու համայնքապետարանը խոչընդոտներ չի ստեղծում: Նրանք զարմացել են, որ շահել են մրցույթներում:
Նրանք անհատական զրույցներում պնդում են, որ սկզբնական փուլում փորձել ենտրամադրվածություն իմանալ Վանաձորի համայնքապետարանի, թե արդյոք իրենք հրաժարվեն, թե ոչ, և մի բան էլ համայնքապետարան է խնդրել, որ հանկարծ չհրաժարվեն: Խոսքը փոքր ընկերությունների մասին է, որոնք պնդում են, որ այլ համայնքներում մշտապես խոչընդոտել են իրենց աշխատանքը, արհեստական խնդիրներ են ստեղծում»:
