Երևանի մետրոպոլիտենի տեխնիկական վիճակին, ընթացող աշխատանքներին և զարգացման ծրագրերին ծանոթանալու նպատակով Երևանի քաղաքապետ Կարեն Կարապետյանն աշխատանքային օրը սկսել է Կարեն Դեմիրճյանի անվան մետրոպոլիտեն կատարած շրջայցով:
Քաղաքապետը նախ ծանոթացել է մետրոպոլիտենի կառավարման համակարգերին, որոնք դեռևս խորհրդային ժամանակների արտադրության սարքավորումներ են: Ու թեև առայժմ ծառայում են անխափան, այդուամենայնիվ, Կարեն Կարապետյանը հստակ խնդիր է դրել կարճ ժամկետում արդիականացնել դրանք` փոխարինելով ավտոմատացված նորագույն սարքավորումներով և հանձնարարվել է կազմել անհրաժեշտ ֆինանսական ծախսերի նախնական փաթեթ:
Այնուհետև քաղաքապետը հետևել է նաև վերջերս մետրոյի կայարաններում տեղադրված տեսախցիկների աշխատանքին: Ուղևորների անվտանգությունն ապահովելու նպատակով` «Անվտանգ Երևան» ծրագրի շրջանակում մայրաքաղաքի տասը կայարաններում տեղադրվել է 186 տեսախցիկ, որոնց աշխատանքին, պլազմային մեծ մոնիտորներով, 24 ժամ անընդմեջ հետևում են մետրոպոլիտենի համապատասխան ծառայության աշխատակիցները: Օրվա ավարտին տեսանյութերն ամբողջությամբ արխիվացվում են: Շուտով կավելանա ևս վեց մոնիտոր: Առաջիկայում տեսախցիկներ են տեղադրվելու նաև շարժակազմերի վագոններում:
Մետրոպոլիտենում կայացած խորհրդակցության ժամանակ զեկուցվել է, որ ՀՀ Անկախության 20-ամյակի կապացությամբ շուտով գործող 45 շարժակազմերին կավելանան ևս երկու` ամբողջությամբ վերանորոգված ու նորովի ձևավորված շարժակազմեր:
Ծանոթանալով նաև մետրոպոլիտենի առօրյա խնդիրներին` Կարեն Կարապետյան, հանձնարարել է Սասունցի Դավիթ, Շենգավիթ, Գործարանային, Գարեգին Նժդեհ և Հանրապետության հրապարակի մետրոկայարանների հիմնանորոգման աշխատանքների համար ուսումնասիրել և կազմել զարգացման հստակ ծրագիր:
«Մետրոյի հետագա զարգացման ռազմավարությունը պատկերացնելու համար մետրոպոլիտենի տնօրինությանը հանձնրարավել է մշակել կարճաժամկետ, միջին և երկարաժամկետ ծրագիր: Ի~նչ խոսք, նոր կայարանների կառուցման խնդիրը անհրաժեշտություն է, սակայն ցավոք այսօր այն բավականին թանկ հաճույք է : Միայն Աջափնյակ թաղամասի երկու կայարանների կառուցումը ավելի քան 200-250 միլիոն դոլար կարժենա: Բայց և այնպես վստահ եմ` կգա այն օրը, երբ կունենանք նոր կայարաններ: Նաև դրա համար է, որ առաջարկել ենք ծրագիր և հայեցակարգ ներկայացնելե – նշել է քաղաքապետը:
Կարեն Կարապետյանը զրուցել է նաև ուղևորների հետ, լսել նրանց կողմից բարձրացված հարցերն ու առաջարկությունները` մետրոյի, սպասարկման որակի և արդյունավետության հետ կապված:
