Սիրիան առաջին անգամ թույլատրել է Կարմիր խաչի միջազգային կոմիտեին մուտք գործել սիրիական բանտեր, որտեղ նրանք պետք է հետևեն, թե ինչպես են վերաբերվում բանտարկյալներին: Կարմիր Խաչից հայտնել են, որ կազմակերպության ներկայացուցիչներն այցելել են Դամասկոսի մերձակայքում գտնվող Ադրա բանտ:
Կարմիր Խաչի ղեկավար Ջեյքոբ Քելլենբերգը նաև հայտարարել է, որ ինքը երկուշաբթի օրը բանակցություններ է վարել Սիրիայի նախագահ Բաշար Ալ-Ասադի հետ: Բանտեր այցելելու անհրաժեշտությունն առաջացել է այն բանից հետո, երբ մի շարք իրավապաշտպաններ հաղոդել են, որ քաղաքական հայացքների համար ձերբակալված մարդիկ դաժան հալածանքների են ենթարկվում բանտերում: Իսկ Amnesty International իրավապաշտպան կազմակերպությունն անցած շաբաթ հաղորդել էր, որ հակակառավարական ելույթների սկսվելուց ի վեր սիրիական բանտերում մոտ 90 մարդ է սպանվել:
Երեկ Հոմս քաղաքում տեղի ունեցած բողոքի ակցիաների ժամանակ Սիրիայի իրավապահները սպանել են 7 մարդու, իսկ անհայտ անձինք` 4 պետական պաշտոնյաների: Տեղի ընդդիմության ներկայացուցիչներն ասել են, որ անցած երկուշաբթին հակակառավարական ելույթները սկսվելուց ի վեր եղել է ամենարյունալի օրը:
