Փոխվարչապետ Մհեր Գրիգորյանի գլխավորությամբ կայացել է հանդիպում Կառավարության ներկայացուցիչների և ԵՄ-ՀՀ Համապարփակ և ընդլայնված գործընկերության համաձայնագրի քաղաքացիական հասարակության պլատֆորմի անդամների միջև: Մհեր Գրիգորյանը նշել է, որ համաձայնագրի լիարժեք կիրարկումը հնարավոր է միայն հանրության լայն շերտերի ներգրավման և ակտիվ մասնակցության պարագայում՝ կարևորելով քաղաքացիական հասարակության՝ որպես Համաձայնագրով ծածկված տարբեր ոլորտներում մասնագիտացված փորձագիտական համայնքի դերն ու ներուժը:
Այս հանդիպմանն անդրադառնալով ԵՄ-ՀՀ Համապարփակ և ընդլայնված գործընկերության համաձայնագրի քաղաքացիական հասարակության պլատֆորմի նախագահ Լուսինե Հակոբյանը «Առաջին լրատվական»-ի հետ զրույցում նշեց, որ խոսքը, ըստ էության, Համապարփակ և ընդլայնված գործընկերության համաձայնագրի 366-րդ հոդվածով նախատեսված քաղհասարակության պլատֆորմի ստեղծման մասին է. «Հիմա մենք այդ պլատֆորմով գնացել էինք հանդիպման: Այդ հանդիպումը մենք էինք նախաձեռնել, խնդրանքով դիմել էինք կառավարությանը, որ հասկանանք մեր հետագա համագործակցության ձևաչափը: Մենք երկու գործառույթ պետք է իրականացնենք այդտեղ. մեկը մշտադիտարկումն է, մյուսը խորհրդատվական աջակցությունը այդ համաձայնագրի կատարման մասով: Սա մեկնարկային հանդիպում էր, մենք դեռ գնահատականներ չենք տվել, որովհետև դեռ մշտադիտարկումը չենք ավարտել: Այս տարի նախատեսելու ենք մեր կողմից սահմանված մի շարք առաջնային ոլորտներում CEPA-ի կատարման մշտադիտարկում և խորհրդատվական աջակցության տրամադրում, ինչը ևս մշտադիտարկման, մեր կողմից վեր հանված խնդիրների, CEPA-ի կատարման խոչընդոտների և այլնի հիման վրա է տրվելու: Ըստ էության, այդ մասին է եղել հանդիպումը, որտեղ երկուստեք փորձել ենք հասկանալ հետագա համագործակցության ձևաչափը»,-ասաց Լուսինե Հակոբյանը:
Նա հավելեց, որ իրենք կառավարությունից խնդրել են մատնանշել՝ ինչ ոլորտներ կան CEPA-ի կատարման մասով, որտեղ իրենք ունեն քաղհասարակության խորհրդատվության կարիքը:
«Դասական ոլորտները հաստատ մեր մշտադիտարկման ներքո լինելու են՝ մարդու իրավունքների իրավիճակ, ժողովրդավարություն, իրավունքի գերակայություն, կոռուպցիայի դեմ պայքար: Դրանք պայմանագրի էական տարրերն են: Նաև լինելու են այլ ոլորտներ, որոնց վրա կկենտրոնանանք, արդեն պայմանավորված պլատֆորմի առանձին անդամների փորձագիտական կարողություններով, ընդհանրապես քաղհասարակության այդ ոլորտներում ունեցած փորձագիտական կարողություններով: Պլատֆորմն ունենալու է նաև համակարգող գործառույթ, և ինքը նաև քաղհասարակությունից պետք է տարբեր կարծիքներ հավաքի և կարողանա ներկայացնել կառավարությանը»,-ասաց նա:
Անդրադառնալով տեսակետին, որ այսօր Հայաստան-ԵՄ հարաբերությունները բարձր մակարդակի վրա են, այդ առումով միայն CEPA-ն բավարար չէ, անհրաժեշտ է այդ հարաբերությունների մակարդակին ավելի համահունչ մեկ այլ համաձայնագիր, Լուսինե Հակոբյանն ասաց. «Ես կողմ եմ դրան, բայց նաև չմոռանանք, որ CEPA-ն էլ այս պահի դրությամբ լիարժեքորեն կիրարկված չէ: Պետք է հասկանանք՝ որքանով ենք այս պայմանագիրը կատարել, կատարման խոչընդոտները որոնք են, ընդհանրապես ի՞նչ պոտենցիալ կա այդ հարաբերությունների զարգացման համար: Իհարկե, ես ուզում եմ ավելի սերտ համագործակցում, փոխհարաբերություններ ԵՄ-ի հետ, բայց մենք պետք է մեր արածները գնահատենք, հասկանանք, թե զարգացման ինչ ներուժ կա»: