Անցյալ տարի աշխարհի տարբեր մասերում տեղի ունեցած երկու աղետները` անտառային զանգվածային հրդեհները Ռուսաստանում և Պակիստանում ուժեղ ջրհեղեղները միմյանց հետ սերտ կապ են ունեցել: Ամերիկյան տիեզարագնացության ազգային գործակալության ուսումնասիրության ժամանակ պարզվել է, որ այս երկու երևույթները պայմաանվորված են եղել միևնույն մթնոլորտային հոսանքերով: Այս եզրակացությունները հաստատվել էին անցյալ տարվա օգոստոսին` բրիտանացի օդերևութաբան Մայք Բլեքբերնի կողմից:
Ինչպես գրում է The Daily Mail-ը, խոսքը այսպես կոչված Ռասսբիի ալիքների մասին է, որոնք իրենցից ներկայացնում են օդային հոսանքների տեղաշարժ, որոնք ազդում են Երկիր մոլորակի եղանակի վրա: Սովորաբար այս հոսանքները ամառվա ընթացքում Եվրասիայի տարածքը հատում են 4-5 օրվա ընթացքում: Սակայան անցած տարի այդ ալիքների հոսքը Ռուսաստանի եվրոպական մասում արգելափակվել էր: Դրա արդյունքում խախտվել էր Ռոսբիի ընթացքը, ինչը հանգեցրել էր նման եղանակային փոփոխությունների:
Սրա հետևանքով Սիբիրից դեպի Ռուսաստանի եվրոպական մաս շարժվող սառը հոսանքները չեն կարողացել մուտք գործել արևմտյան շրջաններ և շարժվել են դեպի Պակիստան, որտեղ, հանդիպելով տաք օդային հոսանքների, հանգեցրել են ուժեղ անձրևների, որոնք ավերիչ ջրհեղեղներ են առաջացրել երկրի տարածքում:
Այս ժամանակ Պակիստանում տուժել էր մոտ 20 միլիոն մարդ, զոհվել էր ավելի քան 2 հազարը:
