Սեպտեմբերի 10-ին «Գաֆեսճյան» արվեստի կենտրոնում փոփ-արտի հիմնադիր Վիկտոր Վազարելիի «Օպտիկական հեռանկարներ» (Optical Perspectives) ցուցահանդեսի շրջանակում կիրականացվի երկու կրթական ծրագիր,- «Առաջին լրատվական»-ի հետ զրույցում ասաց Գաֆեսճյան» արվեստի կենտրոնի հասարակայնության հետ կապերի և մարքեթինգի բաժնի տնօրեն Աննա Սիմոնյանը:
Նրա խոսքով` «Օպ-արտի. գույնի և ձևի փոխակերպումներ» ծրագիրը նախատեսված 5-11 տարեկան երեխաների համար, երկրորդ ծրագիրը` «Տպագրական արվեստի ներածություն»-ը` 12-ից բարձր երեխաների:
«Դա կարող է անգամ հասուն, անգամ մինչև 32 տարեկանների համար հետաքրքիր լինել, քանի որ ոչ միայն օպտիկական արվեստի մասին է, այլև տպագրության, մետաքսագրության»,- նշեց Ա. Սիմոնյանը:
Ինչ վերաբերում է ամեն չորեքշաբթի անցկացվող դասական համերգաշարերին, ապա նա ուրախությամբ տեղեկացրեց, որ ներկայումս արվեստի կենտրոնն ունի ոչ թե գեղարվեստական ղեկավար, այլ գեղարվեստական խորհուրդ, որը որոշում է համերգային ծրագրերը: Դա, ըստ Ա. Սիմոնյանի, կբարձրացնի մատուցվող համերգների որակը: Գեղխորհրդի կազմում են այնպիսի անվանի երաժիշտներ, ինչպիսիք են Արմեն Բաբախանյանը, Աննա Մայիլյանը, Դանիել Երաժիշտը, Նիկա Բաբայանը և կոմպոզիտոր Էդուարդ Հովհաննիսյանը:
«Նոր սեզոն է բացվել, համերգները շարունակվում են, սեպտեմբերի 11-ին ելույթ կունենան թավջութակահար Լևոն Առաքելյանը և դաշնակահար Արթուր Ավանեսովը, սեպտեմբերի 14-ին`Աննա Մայիլյանը: Իսկ սեպտեմբերի 28-ին դաշնակահար Արմեն Բաբախանյանի մենահամերգն է»,- հայտնեց Գաֆեսճյան» արվեստի կենտրոնի հասարակայնության հետ կապերի ու մարքեթինգի բաժնի տնօրենը:
